FÓGRA EARCAÍOCHTA PE/334/2025/S/ITEC
BALL FOIRNE SEALADACH
Speisialtóir i bhfeidhmchláir TFC (AD 7)
Roimh iarratas a chur isteach, léigh go cúramach an Treoir d’Iarrthóirí atá ag gabháil leis an bhfógra earcaíochta seo.
Is cuid dhílis den fhógra earcaíochta í an Treoir, agus cabhróidh sí leat tuiscint a fháil ar na rialacha maidir le nósanna imeachta roghnúcháin agus conas iarratas a dhéanamh.
CLÁR
A. TUAIRISC AR AN bPOST AGUS INCHÁILITHEACHT
B. NÓS IMEACHTA
C. IARRATAIS
IARSCRÍBHINN: TREOIR D’IARRTHÓIRÍ I NÓSANNA IMEACHTA ROGHNÚCHÁIN A EAGRAÍONN PARLAIMINT NA hEORPA
A. TUAIRISC AR AN bPOST AGUS INCHÁILITHEACHT
1. Barúlacha ginearálta
Tá cinneadh déanta ag Parlaimint na hEorpa tús a chur leis an nós imeachta chun trí phost do baill foirne shealadacha (AD 7) a líonadh san Ard-Stiúrthóireacht um Theicneolaíocht Faisnéise agus um Chibearshlándáil (AS ITEC). Is í an phróifíl atá á lorg ná gearrbheathaisnéis do speisialtóir i bhfeidhmchláir TFC.
Mairfidh an conradh go ceann tréimhse éiginnte. Déanfar an t-earcú ag an ngrád AD 7, an chéad chéim, arb é an buntuarastal dó sin EUR 7 646,86 in aghaidh na míosa. Tá an tuarastal sin faoi réir cháin an Aontais Eorpaigh agus na n-asbhaintí eile dá bhforáiltear i gCoinníollacha Fostaíochta Sheirbhísigh Eile an Aontais Eorpaigh (CFSE). Tá sé díolmhaithe ó cháin náisiúnta. Féadfaidh an chéim ag a n-earcófar na hiarrthóirí a n-éireoidh leo a choigeartú i gcomhréir lena dtaithí ghairmiúil. Ina theannta sin, íocfar liúntais sa bhreis ar an mbuntuarastal faoi choinníollacha áirithe.
Is fostóir comhionannais deiseanna í Parlaimint na hEorpa agus glacann sí le hiarratais gan idirdhealú a dhéanamh ar fhorais ar bith amhail inscne, cine, dath, bunadh eitneach nó sóisialta, tréithe géiniteacha, teanga, reiligiún nó creideamh, tuairimí polaitiúla nó aon tuairim eile, a bheith ar dhuine de mhionlach náisiúnta, maoin, breith, míchumas, aois, gnéaschlaonadh, stádas pósta nó stádas teaghlaigh.
2. Tuairisc ar an bpost
Cuireann an Ard-Stiúrthóireacht um Theicneolaíocht Faisnéise agus um Chibearshlándáil (AS ITEC) seirbhísí TF agus cumarsáide ar fáil chun tacú le hobair Pharlaimint na hEorpa. Déanann sé spás oibre inmheánach ilteangach a fhorbairt agus a chothabháil, trí rochtain shlán ar dhoiciméid riachtanacha a áirithiú. Bainistíonn AS ITEC córais TF na Parlaiminte, déanann sé a straitéis nuálaíochta a ailíniú le riachtanais institiúideacha, agus déanann sé formhaoirseacht ar bhonneagar TF slán agus inbhuanaithe. Láimhseálann sé táirgeadh agus dáileadh doiciméad parlaiminteach freisin agus comhoibríonn sé le hOifig na bhFoilseachán i dtaca le foilseacháin oifigiúla.
Tá AS ITEC ag lorg speisialtóirí i bhfeidhmchláir TFC chun teacht go dhá aonad ag a mbeidh ról lárnach maidir le tacú le claochlú digiteach na Parlaiminte.
Tá dhá phost ar fáil in Lucsamburg, agus tá an dá cheann acu ar fáil san Aonad um Dhearadh Réitigh agus um Dhearbhú Cáilíochta (Aonad DESIQUAL). Roghnófar iarrthóir amháin le haghaidh gach ceann de na seirbhísí seo a leanas laistigh den aonad:
- An tSeirbhís um Anailís Theicniúil agus Comhoiriúnú Comhéadain (seirbhís TAUH), ina n-áirithítear dearadh teicniúil fheidhmchláir TF na Parlaiminte. Gníomhóidh an t-iarrthóir a roghnófar mar ailtire teicniúil chun an tírdhreach feidhmchlár a nuachóiriú agus a bharrfheabhsú.
- An tSeirbhís um Anailís ar Fheidhmeanna, Dearadh agus Aitreabúideacht (seirbhís FASDA), ina n-áirithítear dearadh réitigh fheidhmiúil d’fheidhmchláir TF na Parlaiminte. Beidh an t-iarrthóir a bhainfidh an post amach i gceannas ar thionscadail éadála agus comhtháthaithe bogearraí ar mhórscála, ag a mbeidh taithí mhaith ar ailtireacht fiontair, caibidlíocht conarthaí agus bainistiú punainne.
In theannta sin, tá post amháin ar fáil sa Bhruiséil, laistigh den Aonad um Eispéireas Digiteach na gComhaltaí (Aonad E-MEP), a dhíríonn ar sheirbhísí ardcháilíochta pearsantaithe TF d’Fheisirí de Pharlaimint na hEorpa. Déanfaidh an t-iarrthóir a roghnófar an tacaíocht túslíne a chomhordú, formhaoirseacht ar sheiceálacha slándála móibíleacha, rannchuidiú leis an bplean TF agus ceannaireacht ar thionscadail nuálaíochta, lena n-áirítear úsáid IS.
Faoi údarás an mhaoirseora agus ar aon dul leis na cláir agus na tosaíochtaí arna leagan síos ag comhlachtaí rialachais na Parlaiminte agus ag an lucht bainistíochta ábhartha, tabharfaidh speisialtóirí i bhfeidhmchláir TCF faoi roinnt de na gníomhaíochtaí seo a leanas:
· Réitigh bogearraí inscálaithe agus láidre a dhearadh, a fhorbairt agus a chothabháil trí chreataí ríomhchláraithe agus pátrúin ailtireachta nua-aimseartha a úsáid.
· Anailís theicniúil a dhéanamh chun forbairt feidhmchlár agus barrfheabhsú córas a threorú.
· Ceannaireacht a dhéanamh ar chomhtháthú agus imlonnú feidhmchlár bogearraí nó rannchuidiú leo, agus ardchaighdeáin feidhmíochta agus slándála á n-áirithiú.
· Gníomhaíochtaí tacaíochta TF a chomhordú, agus seirbhísí éifeachtúla agus freagrúla á n-áirithiú d’úsáideoirí deiridh i dtimpeallacht éilitheach dhinimiciúil.
· Faireachán a dhéanamh ar shlándáil agus sláine gléasanna agus córas TF, lena n-áirítear cur chun feidhme beart coisctheach agus ceartaitheach.
· Anailís a dhéanamh ar riachtanais an úsáideora agus ar threochtaí atá ag teacht chun cinn chun réitigh dhigiteacha nuálacha a mholadh agus a chur chun feidhme.
· Páirt a ghlacadh i bpleanáil agus comhordú tionscadal TF, lena n-áirítear trí rannchuidiú le measúnuithe riosca agus tuairisciú.
· Ionadaíocht a dhéanamh ar an bhfoireann i gcruinnithe, meithleacha agus fóraim chinnteoireachta a bhaineann le seirbhísí agus straitéis TF.
· Tionscadail chasta TF a bhainistiú, lena n-áirítear éadáil agus comhtháthú bogearraí, agus seachadadh tráthúil costéifeachtach á n-áirithiú.
· Comhar idir geallsealbhóirí teicniúla agus neamhtheicniúla a éascú trí sheachadadh sofhreagrúil agus modheolaíochtaí bainistíochta tionscadail eile a úsáid.
· Anailís gnó a dhéanamh agus riachtanais fheidhmiúla agus theicniúla a bhailiú ó ghrúpaí éagsúla úsáideoirí.
· Tacú le próisis soláthair agus rannchuidiú le caibidlíocht conarthaí le díoltóirí nó soláthraithe seirbhíse seachtracha.
Chun na cúraimí sin a chur i gcrích, beidh gá le sárscileanna eagrúcháin agus comhordúcháin, athléimneacht, tuiscint láidir ar an bhfreagracht, stuaim, scileanna idirphearsanta maithe agus spiorad foirne láidir.
Beidh taisteal idir áiteanna oibre na Parlaiminte i gceist leis an obair.
3. Incháilitheacht
Faoin dáta deiridh atá socraithe do na hiarratais a chur isteach, ní mór na coinníollacha seo a leanas a bheith comhlíonta agat:
(a) Coinníollacha ginearálta
I gcomhréir le hAirteagal 12(2) de Choinníollacha Fostaíochta Sheirbhísigh Eile an Aontais Eorpaigh, ní mór duit:
– a bheith i do náisiúnach de cheann de Bhallstáit an Aontais Eorpaigh,
– do lánchearta mar shaoránach a bheith á dteachtadh agat,
– do dhualgais a bheith comhlíonta agat i ndáil leis na hoibleagáidí seirbhíse míleata is infheidhme de réir dlí.
(b) Coinníollacha sonracha
(i) Na cáilíochtaí is gá
Ní mór duit an méid seo a leanas a bheith agat:
- leibhéal oideachais arb ionann é agus cúrsa ollscoile críochnaithe arna fhianú ag dioplóma i réimse na ríomheolaíochta, na hinnealtóireachta ríomhaireachta, na bainistíochta TFC, na leictreonaice ríomhaireachta nó réimse cosúil i gcás inarb é 4 bliana nó níos mó an tréimhse ghnách oideachais ollscoile,
nó
- leibhéal oideachais arb ionann é agus cúrsa ollscoile críochnaithe arna fhianú ag dioplóma i réimse na ríomheolaíochta, na hinnealtóireachta ríomhaireachta, na bainistíochta TFC, na leictreonaice ríomhaireachta nó réimse cosúil, agus taithí ghairmiúil ábhartha bliana amháin ar a laghad i gcomhréir leis an tuairisc ar an bpost (roinn A.2) i gcás inarb é 3 bliana ar a laghad an tréimhse ghnách oideachais ollscoile, Ní chuirfear an bhliain ghairmiúil taithí seo san áireamh agus an tréimhse taithí gairmiúla is gá, arna sonrú i bpointe 3(b)(ii), á ríomh.
Ní mór do chomhlacht oifigiúil de chuid Ballstát den Aontas Eorpach, amhail an Aireacht Oideachais, na dioplómaí, cibé acu a eisíodh iad i mBallstát nó i dtír nach tír den Aontas Eorpach í, a aithint.
Ní mór d’iarrthóirí a bhfuil dioplómaí acu a eisíodh i dtír nach tír den Aontas Eorpach í coibhéis a gcuid dioplómaí san Aontas Eorpach a chur i gceangal lena n-iarratas. Le haghaidh tuilleadh faisnéise maidir le haitheantas do cháilíochtaí a fuarthas i dtríú tír faoi chuimsiú líonraí ENIC-NARIC, téigh chuig an suíomh seo a leanas: https://www.enic-naric.net.
Tabharfaidh an coiste roghnúcháin aird ar chórais dhifriúla oideachais sna Ballstáit. Féach na samplaí de na híoscháilíochtaí céime a éilítear sa tábla atá sa Treoir d’Iarrthóirí.
Ní chuirfear iarrthóirí nach ndéanann coibhéis a gcuid dioplómaí san Aontas Eorpach a chur i gceangal, i gcás inar gá, agus iarrthóirí nach bhfuil a ndioplómaí aitheanta ag comhlacht oifigiúil de chuid Ballstát den Aontas Eorpach san áireamh sa nós imeachta roghnúcháin.
(ii) An taithí ghairmiúil is gá
Ní mór duit taithí ghairmiúil 4 bliana ar a laghad a bheith agat atá ábhartha do chineál na ndualgas, tar éis na gcáilíochtaí is gá faoi phointe 3(b)(i) a fháil, lena gcuimsítear 2 bhliain in institiúid nó comhlacht de chuid an Aontais Eorpaigh agus/nó i rialtas náisiúnta.
(iii) Eolas ar theangacha
Ní mór sáreolas (leibhéal C1) a bheith agat ar cheann de theangacha oifigiúla an Aontais Eorpaigh (teanga 1): an Béarla, an Bhulgáiris, an Chróitis, an Danmhairgis, an Eastóinis, an Fhionlainnis, an Fhraincis, an Ghaeilge, an Ghearmáinis, an Ghréigis, an Iodáilis, an Laitvis, an Liotuáinis, an Mháltais, an Ollainnis, an Pholainnis, an Phortaingéilis, an Rómáinis, an tSeicis, an tSlóivéinis, an tSlóvaicis, an Spáinnis, an tSualainnis nó an Ungáiris,
agus
eolas sásúil (leibhéal B2 ar a laghad) ar an mBéarla nó ar an bhFraincis (teanga 2).
Ní mór teanga 2 a bheith éagsúil le teanga 1.
Mar sin, i d’fhoirm iarratais, ní mór duit an Béarla nó an Fhraincis a roghnú mar theanga 2.
|
Tabhair do d’aire gur cinneadh an ceanglas maidir le teanga 2 (an Béarla nó an Fhraincis) don nós imeachta seo ar mhaithe le leas na seirbhísí. Teastaíonn scileanna sonracha do na cúraimí a bhíonn ag speisialtóir i bhfeidhmchlár TFC, lena n-áirítear i ndáil le faireachán, cuidiú a áirithiú d’úsáideoirí éagsúla agus tacaíocht chéad líne agus dara líne a sholáthar i gcomhair fadhbanna a bhaineann le TF. Ní mór go mbeidh na baill foirne nua-earcaithe in ann na cúraimí a bheidh le déanamh a thuiscint, fadhbanna a réiteach, agus cumarsáid éifeachtach a dhéanamh le húsáideoirí, leis an lucht bainistíochta agus le comhghleacaithe. Fostaíonn Parlaimint na hEorpa baill foirne éagsúla a oibríonn go príomha ina bhfoirgnimh sa Bhruiséil, i Lucsamburg agus in Strasbourg. Sa chomhthéacs ilteangach sin, braitheann an éifeachtacht oibríochtúil go mór ar úsáid na Fraincise agus an Bhéarla. Tá an dá theanga sin thar a bheith tábhachtach chun a áirithiú go mbeidh an chumarsáid rianúil agus éifeachtúil agus chun go ndéanfar gníomhaíochtaí laethúla a chur i gcrích go rathúil. Tá eolas ar cheann de na teangacha sin ríthábhachtach don bhall foirne chun freagrachtaí an phoist a bhaint amach go héifeachtach agus chun freastal ar riachtanais na seirbhíse i dtaca leis na cúraimí a mbeidh ar an mball foirne tabhairt fúthu. Chun na cúraimí sin a chur i gcrích, beidh gá le hidirghníomhú rialta le comhghleacaithe, le bainisteoirí agus le comhchainteoirí seachtracha, a úsáideann na teangacha sin go príomha ina n-obair laethúil. Ina theannta sin, is trí mheán an Bhéarla agus na Fraincise go príomha a reáchtáiltear oiliúint, cruinnithe foirne agus nósanna imeachta lánpháirtíochta do bhaill foirne nua, rud a leagann béim ar a thábhachtaí atá eolas ar ar a laghad ceann amháin den dá theanga sin. In AS ITEC, is í an Fhraincis an teanga is mó a úsáidtear le haghaidh cumarsáid inmheánach, agus is é an Béarla an teanga is coitianta sa chaidreamh le ASanna eile agus le húdaráis pholaitiúla agus riaracháin na Parlaiminte. Tá eolas sásúil ar an mBéarla ríthábhachtach toisc go bhfuil an chuid is mó den doiciméadacht theicniúil, de na lámhleabhair bogearraí agus de na hacmhainní tacaíochta TF ar fáil i mBéarla go príomha. Tá ceanglais teanga an nós imeachta seo i gcomhréir le cleachtas seanbhunaithe dá bhrí sin. Mar chonclúid, tá údar le teanga 2 a theorannú don Bhéarla nó don Fhraincis sa nós imeachta roghnúcháin seo mar gheall ar riachtanais oibríochtúla na seirbhíse, riachtanais an phoist mar speisialtóir i bhfeidhmchláir TCF agus cleachtais inmheánacha na n-Ard-Stiúrthóireachtaí chun an éifeachtacht agus an comhtháthú is fearr laistigh de Pharlaimint na hEorpa a áirithiú. |
B. NÓS IMEACHTA
Tá an nós imeachta bunaithe ar cháilíochtaí agus ar thrialacha.
1. Iontráil agus measúnú ar cháilíochtaí (an chéad chéim)
(a) Tarraingeoidh an t-údarás ceapacháin suas liosta d’iarrthóirí a mbeidh a n-iarratais curtha isteach acu san fhoirm is gá faoin dáta deiridh agus a chomhlíonann na coinníollacha ginearálta a leagtar amach i roinn A, pointe 3(a). Cuirfear an liosta seo ar aghaidh chuig an gcoiste roghnúcháin in éineacht leis na comhaid iarratais
(b) Bunaithe ar an bhfaisnéis a thugtar ar an bhfoirm iarratais, agus bunaithe ar an bhfaisnéis sin amháin, a dtugtar bunús léi le doiciméid tacaíochta a chuirtear isteach le chéile agus ag an am céanna leis an bhfoirm iarratais (le haghaidh tuilleadh eolais féach an Treoir d'Iarrthóirí maidir le nósanna imeachta roghnúcháin a eagraíonn Parlaimint na hEorpa, pointe 3.3):
Scrúdóidh an coiste roghnúcháin na doiciméid tacaíochta a sholáthrófar chun a fhíorú an gcomhlíonann iarrthóirí na coinníollacha sonracha iontrála, mar a leagtar amach i roinn A, pointe 3(b).
(c) Maidir le hiarrthóirí a ghlacfar isteach sa nós imeachta roghnúcháin, déanfaidh an coiste roghnúcháin measúnú ar a gcáilíochtaí trí úsáid a bhaint as greille mharcála, a bheidh leagtha síos roimh ré. Déanfaidh an coiste roghnúcháin measúnú ar cháilíochtaí na n-iarrthóirí a ghlacfar isteach agus tarraingeoidh sé suas liosta den 18 n-iarrthóir incháilithe is airde rangú, a dtabharfar cuireadh chun na dtrialacha dóibh. Tabharfaidh an coiste roghnúcháin cuireadh d’aon iarrthóirí atá ar chomhscór don áit cháilitheach deiridh.
Agus measúnú á dhéanamh aige ar cháilíochtaí na n-iarrthóirí, cuirfidh an coiste roghnúcháin na gnéithe seo a leanas i gcuntas (arna ndoiciméadú go cuí le fianaise thacaíochta ina léirítear go soiléir cineál na gcúraimí ar tugadh fúthu, fad na fostaíochta agus an comhthéacs ina bhfuarthas an taithí):
1. Taithí chruthaithe ar dhearadh, forbairt agus cothabháil réiteach bogearraí nua-aimseartha, trí úsáid a bhaint as ailtireacht sheirbhísbhunaithe agus mhicrisheirbhís-bhunaithe, más féidir.
2. Cumas léirithe chun anailís theicniúil a dhéanamh agus rannchuidiú le cinntí ailtireachta bogearraí i gcomhthéacs chórais chasta TF.
3. Taithí ghairmiúil ar chomhtháthú, imlonnú agus bainistiú saolré maidir le feidhmchláir bogearraí.
4. Taithí ghairmiúil ar sheirbhísí tacaíochta TF a bhainistiú nó a chomhordú, go háirithe i dtimpeallachtaí ina bhfuil gá le freagrúlacht agus inoiriúnaitheacht do riachtanais an úsáideora.
5. Eolas agus taithí phraiticiúil ar chleachtais slándála TF, go háirithe i ndáil le cosaint críochphointe, slándáil gléasanna móibíleacha nó bainistiú rochtana sláine.
6. Cumas léirithe chun measúnú a dhéanamh ar riachtanais úsáideoirí agus aghaidh a thabhairt orthu trí réitigh theicniúla nuálacha, lena n-áirítear trí theicneolaíochtaí atá ag teacht chun cinn a chur chun feidhme.
7. Rannpháirtíocht i bpleanáil, faireachán agus tuairisciú ar thionscadail TF, lena n-áirítear anailís riosca agus rannchuidiú le doiciméid pleanála straitéisí nó pleanála oibríochtúla.
8. Taithí arb ionann í agus seirbhís nó feidhm TF i meithleacha, coistí nó struchtúir chomhordaithe thrasfheidhmiúla.
9. Taithí chruthaithe ar bhainistiú tionscadal casta TF, lena mbaineann éadáil bogearraí, comhtháthú tríú páirtí nó timpeallachtaí il-gheallsealbhóra, más féidir.
10. Eolas fónta ar mhodheolaíochtaí bainistíochta tionscadal nó seachadta shofhreagrúil, a dtacaítear leis le cur i bhfeidhm agus/nó deimhniú praiticiúil (e.g. SAFe, PMI, PRINCE2).
11. Taithí ar anailís ghnó agus múscailt riachtanas, i dtimpeallacht struchtúrtha lena mbaineann próifílí úsáideora iomadúla nó ranna iomadúla más féidir.
12. Taithí phraiticiúil ar thacú le nósanna imeachta soláthair TF nó ar thabhairt fúthu, lena n-áirítear idirghníomhaíocht le díoltóirí seachtracha agus rannpháirtíocht i gcaibidlíocht conarthaí.
13. Taithí ghairmiúil ar thimpeallachtaí oibre ilchultúrtha nó idirnáisiúnta.
Marcáil: 0 go 40 pointe
2. Trialacha (an dara céim)
Triail scríofa
a Tástáil dréachtaithe i dteanga 2 (Béarla nó Fraincis), chun do chumas tabhairt faoi na dualgais a leagtar amach i roinn A, pointe 2, agus do scileanna dréachtaithe, a thástáil.
Uasfhad ama na trialach: 90 nóiméad.
Marcáil: 0 go 20 pointe (pasmharc: 10).
Triail chainte
b Agallamh leis an gcoiste roghnúcháin i dteanga 2 (Béarla nó Fraincis) chun measúnú a dhéanamh, agus an fhaisnéis uile atá i do chomhad iarratais á cur i gcuntas, ar d’oiriúnacht maidir le tabhairt faoi na dualgais a leagtar amach i roinn A, pointe 2, chomh maith le d’eolas ar Pharlaimint na hEorpa.
Uasfhad ama: 45 nóiméad.
Marcáil: 0 go 40 pointe (pasmharc: 20).
D’fhéadfaí na trialacha sin a eagrú go cianda nó go pearsanta.
Gheobhaidh tú treoracha maidir leis na trialacha scríofa agus cainte in am trátha. Ní mór duit cloí go huile agus go hiomlán leis na treoracha. Mura gcloíonn tú leis na treoracha nó má dhéanann tú aon bhearta nach bhfuil comhsheasmhach leis na treoracha, dícháileofar thú láithreach.
3. Liosta d’iarrthóirí oiriúnacha
Tarraingeoidh an coiste roghnúcháin suas liosta iarrthóirí oiriúnacha ina mbeidh, in ord aibítre, ainmneacha an naonúr iarrthóirí a bhfuil an scór is airde bainte amach acu le linn an nós imeachta (measúnú ar cháilíochtaí agus tástálacha), ar choinníoll go bhfuil pasmharc bainte amach ag an iarrthóir sa dá thástáil. Áireofar ar na liostaí aon iarrthóirí atá ar chomhscór don áit deiridh.
Cuirfear ar an eolas thú faoi do thorthaí ar bhonn indibhidiúil i scríbhinn.
Foilseofar liosta na n-iarrthóirí oiriúnacha ar shuíomh gréasáin oifigiúil Pharlaimint na hEorpa.
Rachaidh bailíocht an liosta d’iarrthóirí oiriúnacha in éag an 31 Nollaig 2028; Féadfar bailíocht an liosta sin a fhadú trí chinneadh ón údarás ceapacháin. Má chuirtear síneadh leis, déanfar na hiarrthóirí a bhfuil a n-ainmneacha ar an liosta a chur ar an eolas in am trátha.
C. IARRATAIS
Caithfidh cuntas a bheith agat ar an ardán Apply4EP chun iarratas a dhéanamh: https://apply4ep.gestmax.eu/search/index/lang/ga.
Ní mór duit an Treoir d’Iarrthóirí i nósanna imeachta roghnúcháin arna n-eagrú ag Parlaimint na hEorpa a léamh go cúramach sula ndéanfaidh tú an fhoirm iarratais a chomhlánú.
Spriocdháta le haghaidh iarratas
An spriocdháta chun iarratais a chur isteach ná:
12:00 (nóin), am Lucsamburg, ar an 16 Meán Fómhair 2025.
Seolfar admháil fála go huathoibríoch duit a luaithe a bhailíochtófar d’fhoirm iarratais.
Níor cheart duit teagmháil a dhéanamh maidir leis an gcomórtas seo ach amháin trí do chuntas Apply4EP. NÁ CUIR SCAIRT TEILEAFÓIN chun fiosrú a dhéanamh faoin gcomórtas seo.
Tá tusa freagrach as bosca isteach an tseolta ríomhphoist a chuir tú in iúl ar do chuntas Apply4EP a sheiceáil go rialta.
Ar ais chuig an liosta