FÓGRA FOLÚNTAIS PE/333/2025/S/PERS

 COMHALTA DEN FHOIREANN SHEALADACH

 Bainisteoir Riaracháin (AD 8)

Sula ndéanfaidh tú iarratas, ní mór duit an Treoir d’iarrthóirí i nósanna imeachta roghnúcháin arna n-eagrú ag Parlaimint na hEorpa, ar Treoir í atá i gceangal leis an bhfógra folúntais seo, a léamh go cúramach. 

Is cuid dhílis den fhógra folúntais í an Treoir agus cuidíonn sí le tuiscint a fháil ar na rialacha lena rialaítear na nósanna imeachta roghnúcháin agus ar conas iarratas a dhéanamh.

CLÁR

A.                SAINCHUNTAS POIST AGUS INCHÁILITHEACHT

B.                NÓS IMEACHTA

C.               IARRATAIS 

IARSCRÍBHINN:  AN TREOIR d’IARRTHÓIRÍ I NÓSANNA IMEACHTA ROGHNÚCHÁIN ARNA nEAGRÚ AG PARLAIMINT NA hEORPA

A. SAINCHUNTAS POIST AGUS INCHÁILITHEACHT

 1.    Barúlacha ginearálta

 Tá cinneadh déanta ag Parlaimint na hEorpa tús a chur leis an nós imeachta chun post mar chomhalta den fhoireann shealadach, ar ghrád AD 8, in Ard-Stiúrthóireacht an Phearsanra a líonadh. Is í an Bhruiséil an áit oibre.

 Is í an phróifíl atáthar a lorg ná próifíl an Bhainisteora Riaracháin.

 Mairfidh an conradh go ceann tréimhse éiginnte. Déanfar an earcaíocht ar ghrád AD 8, an chéad chéim, ag a bhfuil buntuarastal EUR 8 651.92 in aghaidh na míosa. Tá an tuarastal sin faoi réir cháin an Aontais agus na n-asbhaintí eile dá bhforáiltear i gCoinníollacha Fostaíochta Sheirbhísigh Eile an Aontais Eorpaigh (CFSE). Tá sé díolmhaithe ó cháin náisiúnta. Féadfar an chéim ar a n-earcófar an t-iarrthóir rathúil a choigeartú i gcomhréir le taithí ghairmiúil an iarrthóra sin. Thairis sin, in imthosca áirithe, íocfar liúntais de bhreis ar an mbuntuarastal.

 Is fostóir comhionannais deiseanna í Parlaimint na hEorpa agus cuireann sí fáilte roimh iarratais gan idirdhealú a dhéanamh ar fhoras ar bith amhail inscne, dath, bunadh eitneach nó sóisialta, tréithe géiniteacha, teanga, reiligiún nó creideamh, tuairimí polaitiúla nó aon tuairim eile, a bheith ar dhuine de mhionlach náisiúnta, maoin, breith, míchumas, aois, gnéaschlaonadh, stádas pósta nó stádas teaghlaigh.

2.    Sainchuntas poist

 Bainistíonn Ard-Stiúrthóireacht an Phearsanra (AS PERS) acmhainní daonna laistigh d’Ardrúnaíocht na Parlaiminte chun a áirithiú gur féidir le Feisirí de Pharlaimint na hEorpa a ndualgais a chomhlíonadh go héifeachtach. Chomh maith lena feidhmeanna riaracháin, glacann AS PERS chuige féin pleanáil réamhghníomhach don lucht saothair, earcaíocht, oiliúint agus forbairt, agus béim láidir á leagan ar thacaíocht aonair, ar chomhionannas agus ar éagsúlacht. Díríonn AS PERS ar an duine aonair, agus cuireann sé tacaíocht shaincheaptha shóisialta agus leighis ar fáil, agus áirithíonn sé ag an am céanna go bhfuil a ghníomhaíochtaí uile ailínithe le riachtanais institiúideacha, leis na rialacha is infheidhme, agus le srianta buiséadacha. Oibríonn AS PERS le hArd-Stiúrthóireachtaí eile na Parlaiminte chun meon atá dírithe ar sheirbhís a chur chun cinn agus chun a áirithiú go n-úsáidtear acmhainní airgeadais go héifeachtúil trí shásraí láidre rialaithe.

Déanfaidh an bainisteoir riaracháin maoirseacht agus comhordú ar fhoireann bainisteoirí comhad a bhíonn ag déileáil le pribhléidí agus díolúintí foirne. Tá an fhoireann freagrach as an bprótacal ar phribhléidí agus díolúintí (Prótacal Uimh. 7 de na Conarthaí) a chur i bhfeidhm i dtrí phríomhionad oibre Pharlaimint na hEorpa: an Bheilg, an Fhrainc agus Lucsamburg. Déanfaidh an t-iarrthóir rathúil ionadaíocht ar an bhfoireann i bhfóraim éagsúla, ag tabhairt saineolais nuair a iarrtar sin air. Tá teagmhálacha le gach cineál comhghleacaithe, go háirithe Cúntóirí Parlaiminteacha Creidiúnaithe (APAnna), mar chuid de chúraimí laethúla an róil. Beidh dlúthbhaint ag an iarrthóir rathúil le gníomhaíochtaí a bhaineann le hathrú ar théarmaí parlaiminteacha.

Éilíonn na freagrachtaí sin scileanna láidre cumarsáide, rúndacht dhocht, taidhleoireacht, agus an cumas idirghníomhú go héifeachtach le daoine ar gach leibhéal. Ní mór don iarrthóir a bheith in ann déileáil le dian-ualaí oibre ar bhonn rialta, ag oibriú go neamhspleách agus mar chuid d’fhoireann, agus a bheith ar a suaimhneas i dtimpeallacht oibre ilchultúrtha ilteangach.

Faoi údarás a mhaoirseora dhírigh, déanfaidh an bainisteoir riaracháin na príomhdhualgais seo a leanas:

–         maoirseacht agus comhordú a dhéanamh ar fhoireann bainisteoirí comhad atá freagrach as pribhléidí agus díolúintí foirne, lena n-áirithítear úsáid éifeachtúil acmhainní chun seirbhísí tacaíochta riaracháin agus dlí a sholáthar;

–         cuspóirí agus pleananna gníomhaíochta a cheapadh, a tharraingt suas, a mholadh agus obair leantach a dhéanamh orthu, lena rannchuidítear le cur chun feidhme cuspóirí straitéiseacha agus oibríochtúla;

–         tacú le nósanna imeachta agus sreafaí oibre inmheánacha a chur chun feidhme, lena n-áirítear bailíochtú agus bailíochtuithe riaracháin a chomhordú; 

–         tionscadail shonracha a stiúradh agus a chomhordú, rannchuidiú le tionscadail nó tionscnaimh oiliúna a eagrú sna réimsí ábhartha gníomhaíochta, lena n-áirithítear pleanáil agus seachadadh;

–         staidéir, nótaí, achoimrí agus/nó staidreamh a ullmhú, anailís agus ullmhú a dhéanamh ar dhréachtrialacha a thacaíonn le léirmhíniú agus cur chun feidhme rialachán sna réimsí ábhartha gníomhaíochta;

–         tacú le cinnteoireacht agus í a chumasú i réimse freagrachta na roinne, chomh maith le hionchur agus comhairle a chur ar fáil don bhainistíocht maidir le gnéithe dlíthiúla, oibríochtúla agus riaracháin an eintitis.

3.    Incháilitheacht

 Ar an dáta deiridh i gcomhair iarratas, ní mór na critéir incháilitheachta ghinearálta agus shonracha a bheith comhlíonta agat.

(a)     Critéir ghinearálta

 Faoi Airteagal 12(2) de Choinníollacha Fostaíochta Sheirbhísigh Eile an Aontais Eorpaigh:

 –         ní mór duit a bheith i do náisiúnach de cheann de Bhallstáit an Aontais Eorpaigh,

–         ní mór na cearta iomlána mar shaoránach a bheith á dteachtadh agat,

–         ní mór aon oibleagáidí arna bhforchur ort leis na dlíthe maidir le seirbhís mhíleata a bheith comhlíonta agat,

(b)     Critéir shonracha

 (i)      Na cáilíochtaí is gá

 –         leibhéal oideachais arb ionann é agus cúrsa ollscoile a bheith críochnaithe, agus dioplóma ina dhearbhú air sin, nuair is é 4 bliana nó níos mó gnáth-thréimhse an oideachais ollscoile,

 nó

 _         leibhéal oideachais arb ionann é agus cúrsa ollscoile a bheith críochnaithe, agus dioplóma ina dhearbhú air sin, agus bliain ar a laghad de thaithí ghairmiúil atá ábhartha don sainchuntas poist (roinn 2) nuair is é 3 bliana ar a laghad gnáth-thréimhse an oideachais ollscoile. Ní dhéanfar an bhliain sin de thaithí ghairmiúil a chur i gcuntas agus an tréimhse taithí gairmiúla is gá a shonraítear i bpointe 3(b)(ii) á ríomh.

Ní mór do chomhlacht oifigiúil de chuid Ballstáit den Aontas Eorpach, amhail an Aireacht Oideachais, na dioplómaí a aithint, cibé acu a eisíodh iad i mBallstát nó i dtír nach tír den Aontas Eorpach í.

Ní mór d’iarrthóirí a bhfuil dioplómaí acu a eisíodh i dtír nach tír den Aontas Eorpach í coibhéis a gcuid dioplómaí san Aontas Eorpach a chur i gceangal lena n-iarratas. Chun tuilleadh faisnéise a fháil faoin dóigh a n-aithnítear cáilíochtaí arna mbaint amach i dtír nach tír den Aontas Eorpach í i líonraí ENIC-NARIC, féach an nasc seo a leanas: https://www.enic-naric.net. Déanfaidh an bord roghnúcháin na difríochtaí idir na córais oideachais a chur i gcuntas. Sa tábla atá sa Treoir d’iarrthóirí, tá samplaí de na cáilíochtaí íosta is gá. Iarrthóirí nach ndéanfaidh coibhéis a gcuid dioplómaí san Aontas Eorpach a chur i gceangal lena n-iarratas agus/nó iarrthóirí a bhfuil dioplómaí acu nach n-aithníonn comhlacht oifigiúil de chuid Ballstáit den Aontas Eorpach, ní ligfear isteach sa nós imeachta roghnúcháin iad.

(ii)        An taithí ghairmiúil is gá

 Tar éis duit na cáilíochtaí lena dtugtar rochtain ar an bpróiseas roghnúcháin (féach pointe (i) thuas) a ghnóthú, ní mór an taithí ghairmiúil seo a leanas a bheith agat:

 –         ní mór 6 bliana ar a laghad de thaithí ghairmiúil atá ábhartha do na dualgais a shonraítear i Roinn A.2. a bheith ag na hiarrthóirí, agus ní mór dhá bhliain ar a laghad den taithí sin a bheith faighte acu i riarachán náisiúnta nó in institiúidí nó i gcomhlacht de chuid an Aontais Eorpaigh. 

(iii)    Eolas ar theangacha

 Ní mór eolas críochnúil (leibhéal C1 ar a laghad) a bheith ag na hiarrthóirí ar cheann de theangacha oifigiúla an Aontais Eorpaigh (teanga 1): an Béarla, an Bhulgáiris, an Chróitis, an Danmhairgis, an Eastóinis, an Fhionlainnis, an Fhraincis, an Ghaeilge, an Ghearmáinis, an Ghréigis, an Iodáilis, an Laitvis, an Liotuáinis, an Mháltais, an Ollainnis, an Pholainnis, an Phortaingéilis, an Rómáinis, an tSeicis, an tSlóivéinis, an tSlóvaicis, an Spáinnis, an tSualainnis nó an Ungáiris,

 agus

 eolas sásúil (leibhéal B2 ar a laghad) ar an mBéarla nó ar an bhFraincis (teanga 2).

 Ní mór teanga 2 a bheith éagsúil le teanga 1. 

Dá bhrí sin, ní mór duit an Béarla nó an Fhraincis a roghnú mar Theanga 2 san fhoirm iarratais.

B. NÓS IMEACHTA

Tá an nós imeachta bunaithe ar cháilíochtaí agus ar thrialacha.

1.         Ligean isteach agus measúnú cáilíochtaí (an chéad chéim)

 (a)     Tarraingeoidh an t-údarás ceapacháin suas liosta d’iarrthóirí a bhfuil a n-iarratais curtha isteach acu san fhoirm is gá faoin dáta deiridh agus a chomhlíonann na coinníollacha ginearálta a leagtar amach i Roinn A.3.(a). Cuirfear é sin ar aghaidh chuig an gcoiste roghnúcháin maille leis na comhaid iarratais.

 Bunaithe ar an bhfaisnéis a thugtar ar an bhfoirm iarratais, agus uirthi sin amháin, agus doiciméid tacaíochta mar bhunús léi, a chuirtear isteach in éineacht leis an bhfoirm iarratais, i.e. faoin dáta deiridh le haghaidh iarratas; (chun tuilleadh sonraí a fháil, féach an Treoir d’iarrthóirí i nósanna imeachta roghnúcháin arna n-eagrú ag Parlaimint na hEorpa, pointe 3.3):

 (b)     Scrúdóidh an coiste roghnúcháin na doiciméid tacaíochta a chuirtear isteach chun a fhíorú cé na hiarrthóirí a chomhlíonann na coinníollacha sonracha a leagtar amach i Roinn A.3(b) maidir le ligean isteach.

 (c)     Is ar bhonn na ndoiciméad tacaíochta a chuirtear isteach, agus ar an mbonn sin amháin, a dhéanfaidh an coiste roghnúcháin measúnú ar cháilíochtaí na n-iarrthóirí a ligfear isteach. Agus úsáid á baint as greille mharcála réamhshainithe, déanfaidh an coiste roghnúcháin meastóireacht ar na hiarrthóirí a ligfear isteach agus tarraingeoidh sé suas liosta den seisear iarrthóirí incháilithe is airde rangú, a dtabharfar cuireadh dóibh chuig na trialacha. Tabharfaidh an bord roghnúcháin cuireadh do gach iarrthóir atá ar comhscór don áit cháilithe deiridh.

Agus measúnú á dhéanamh aige ar cháilíochtaí na n-iarrthóirí, déanfaidh an coiste roghnúcháin na gnéithe seo a leanas a chur i gcuntas go háirithe:

 cáilíochtaí agus dioplómaí a bhaineann leis an réimse (dlí, riarachán poiblí, eolaíocht pholaitiúil);

1. taithí ghairmiúil ar mhaoirseacht agus comhordú a dhéanamh ar fhoireann tacaíochta riaracháin agus/nó dhlíthiúil i gcomhair acmhainní daonna;
2. taithí ar chuspóirí agus pleananna gníomhaíochta a fhorbairt, a chur chun feidhme agus faireachán a dhéanamh orthu, lena rannchuidítear le tosaíochtaí straitéiseacha nó oibríochtúla laistigh de chomhthéacs riaracháin nó dlíthiúil;
3. taithí chruthaithe ar thacú le bainistíocht riaracháin agus airgeadais, lena n-áirítear sreafaí oibre inmheánacha a chomhordú (e.g. bailíochtú conarthaí nó próisis ríomhshínithe);
4. taithí ar thionscadail nó ar ghníomhaíochtaí oiliúna a phleanáil, a eagrú nó a sheachadadh, go háirithe i réimsí dlí nó institiúideacha;
5. taithí shuntasach ar dhoiciméid dlí nó riaracháin a dhréachtú, amhail nótaí, tuarascálacha, rialacha, achoimrí nó forléargais staidrimh, i dtimpeallacht ilteangach chasta;
6. taithí ar chomhairle dhlíthiúil agus/nó riaracháin a sholáthar don bhainistíocht, lena n-áirítear anailís agus léirmhíniú a dhéanamh ar an reachtaíocht is infheidhme, ar an gcásdlí nó ar na rialacha inmheánacha;
7. cumas cruthaithe cinnteoireacht a ullmhú agus a éascú i réimsí na freagrachta oibríochtúla nó bainistíochta trí ionchur nó anailís struchtúrtha a sholáthar;
8. taithí ar idirchaidreamh agus comhordú a dhéanamh le ranna eile agus/nó le comhpháirtithe institiúideacha, lena n-áirithítear comhsheasmhacht agus ailíniú in ábhair riaracháin nó dhlíthiúla;
9. taithí ghairmiúil i dtimpeallacht oibre ilchultúrtha nó ilnáisiúnta, lena léirítear inoiriúnaitheacht agus scileanna láidre idirphearsanta agus idirchultúrtha.

Marcáil: 0 go 20 pointe.

Cuirfear in iúl duit, trí ríomhphost, cibé acu atá nó nach bhfuil cinneadh déanta ag an gcoiste roghnúcháin cuireadh chun na dtrialacha a thabhairt duit.

2. Trialacha (an dara céim)

D’fhonn measúnú a dhéanamh ar eolas na n-iarrthóirí agus na scileanna atá ábhartha do na dualgais a thuairiscítear thuas, reáchtálfaidh an coiste roghnúcháin na trialacha seo a leanas:

Triail scríofa

 a) Triail cheapadóireachta i dteanga 2 (an Béarla nó an Fhraincis), chun measúnú a dhéanamh ar do chumas na dualgais a thuairiscítear i bpointe A.2. a chomhlíonadh, agus ar do scileanna dréachtaithe freisin.

 Fad na trialach: 90 nóiméad ar a mhéad

 Marcáil: ó 0 go 20 pointe (an líon íosta pointí is gá: 10 bpointe)

Triail chainte

 b) Agallamh leis an gcoiste roghnúcháin i dteanga 2 (an Béarla nó an Fhraincis), chun measúnú a dhéanamh ar do chumas na dualgais a thuairiscítear i Roinn A.2 a chomhlíonadh.

 Fad uasta na trialach: 45 nóiméad ar a mhéad.

 Marcáil: ó 0 go 40 pointe (an líon íosta pointí is gá: 20 pointe).

Gheobhaidh tú treoracha maidir leis na trialacha in am trátha. Ní mór duit cloí go huile agus go hiomlán leis na treoracha. Mar gheall ar aon mhainneachtain cloí leis na treoracha nó ar ghníomhaíocht a dhéanamh atá ar neamhréir leis na treoracha, dícháileofar láithreach thú.

3.         Liostaí d’iarrthóirí oiriúnacha

Tarraingeoidh an coiste roghnúcháin suas liosta d’iarrthóirí oiriúnacha ina mbeidh, in ord aibítre, ainmneacha an triúr iarrthóirí a mbeidh na scóir fhoriomlána is airde faighte acu sa nós imeachta (measúnú cáilíochtaí agus na trialacha), ar choinníoll go mbeidh pasmharc bainte amach ag an iarrthóir sa dá thriail. Sa liosta, áireofar aon iarrthóirí atá ar comhscór san áit deiridh.

Cuirfear ar an eolas thú, i scríbhinn, faoi do thorthaí.

Foilseofar liosta na n-iarrthóirí oiriúnacha ar shuíomh gréasáin oifigiúil Pharlaimint na hEorpa.

Rachaidh tréimhse bhailíochta an liosta d’iarrthóirí oiriúnacha in éag an 31 Nollaig 2028. Féadfar síneadh a chur le bailíocht na liostaí sin trí chinneadh ón údarás ceapacháin. Má chuirtear síneadh léi, déanfar na hiarrthóirí a mbeidh a n-ainmneacha ar na liostaí a chur ar an eolas faoi sin in am trátha.

C. IARRATAIS

Ní mór duit iarratas a dhéanamh tríd an ardán Apply4EP: https://apply4ep.gestmax.eu/search/index/lang/ga_GA

 Ní mór duit an Treoir d’iarrthóirí i nósanna imeachta roghnúcháin arna n-eagrú ag Parlaimint na hEorpa a léamh go cúramach sula ndéanfaidh tú an fhoirm iarratais a chomhlánú.

 Spriocdháta le haghaidh iarratas

12.00 (meán lae), am na Bruiséile, an 16 Meán Fómhair 2025

Seolfar admháil fála chugat go huathoibríoch a luaithe a bheidh do chomhad iarratais bailíochtaithe.

Níor cheart duit cumarsáid a dhéanamh faoin gcomórtas seo ach amháin trí do chuntas Apply4EP. NÁ CUIR GLAOCH TEILEAFÓIN chun ceist a chur faoin gcomórtas seo. 

Is fút féin atá sé bosca isteach an tseolta ríomhphoist a luaigh tú i do chuntas Apply4EP a sheiceáil go rialta.