Qabel tapplika għandek taqra sew il-Gwida għall-Kandidati annessa ma' dan l-avviż ta' reklutaġġ.
Il-gwida hija parti integrali mill-avviż ta' reklutaġġ. Se tgħinek tifhem ir-regoli marbuta mal-proċeduri ta' selezzjoni organizzati mill-Parlament Ewropew u kif tapplika.
WERREJ
A. DESKRIZZJONI TAL-FUNZJONIJIET U REKWIŻITI TA' ELEĠIBILITÀ
B. ŻVOLĠIMENT TAL-PROĊEDURA
C. TRESSIQ TAL-APPLIKAZZJONIJIET
ANNESS: GWIDA GĦALL-KANDIDATI FIL-PROĊEDURI TA' SELEZZJONI ORGANIZZATI MILL-PARLAMENT EWROPEW
A. DESKRIZZJONI TAL-FUNZJONIJIET U REKWIŻITI TA' ELEĠIBILITÀ
1. Kummenti ġenerali
Il-Parlament Ewropew iddeċieda li jniedi proċedura għall-pożizzjoni ta' aġent temporanju (AST 5), għar-relazzjonijiet mal-awtoritajiet nazzjonali, għall-Kabinett tas-Segretarju Ġenerali.
Il-kuntratt se jiġi konkluż għal perjodu indefinit. Ir-reklutaġġ se jsir fil-grad AST 5, l-ewwel skala, b'salarju bażiku ta' EUR 4 917,29 fix-xahar. Dan is-salarju huwa soġġett għat-taxxa Komunitarja u tnaqqis ieħor previst mill-Kondizzjonijiet tal-Impjieg ta' Aġenti Oħra tal-Unjoni Ewropea (ir-Regolament (KEE, Euratom, KEFA) Nru 259/68 tal-Kunsill (ĠU L 56, 4.3.1968, p. 1), kif emendat mir-Regolament tal-Kunsill (KE, Euratom) Nru 723/2004 tat-22 ta' Marzu 2004 (ĠU L 124, 27.4.2004, p. 1) u aktar riċenti mir-Regolament (UE, Euratom) Nru 1023/2013 tal-Parlament Ewropew u tal-Kunsill tat-22 ta' Ottubru 2013 li jemenda r-Regolamenti tal-Persunal għall-Uffiċjali tal-Unjoni Ewropea u l-Kondizzjonijiet tal-Impjieg ta' Aġenti Oħra tal-Unjoni Ewropea (ĠU L 287, 29.10.2013, p. 15). Is-salarju huwa eżenti mit-taxxa nazzjonali. L-iskala li fiha se tiġi reklutata l-persuna li tintgħażel madankollu tista' tiġi adattata skont l-esperjenza professjonali ta' din il-persuna. Barra minn hekk, is-salarju bażiku, f'ċerti kondizzjonijiet, jiżdied b'xi allowances.
Ir-reklutaġġ ta' aġent temporanju huwa dirett biex jiżgura li l-istituzzjoni tuża s-servizzi ta' persuni tal-ogħla standard ta' kapaċità, effiċjenza u integrità, reklutati fuq l-aktar bażi ġeografika wiesgħa possibbli fost iċ-ċittadini tal-Istati Membri tal-Unjoni.
Il-Parlament Ewropew japplika politika ta' opportunitajiet indaqs u jaċċetta l-applikazzjonijiet mingħajr ebda diskriminazzjoni, bħal pereżempju diskriminazzjoni bbażata fuq il-ġeneru, ir-razza, il-kulur, l-oriġini etnika jew soċjali, il-karatteristiċi ġenetiċi, il-lingwa, ir-reliġjon jew it-twemmin, l-opinjonijiet politiċi jew oħrajn, l-appartenenza għal minoranza nazzjonali, il-proprjetà, it-twelid, id-diżabilità, l-età, l-orjentament sesswali, l-istat ċivili jew is-sitwazzjoni tal-familja.
2. Deskrizzjoni tal-funzjonijiet
Meta jaħdem fl-Uffiċċju tas-Segretarju Ġenerali, l-assistent għar-relazzjonijiet mal-awtoritajiet nazzjonali se jkun inkarigat mill-kuntatti mal-awtoritajiet nazzjonali u reġjonali b'mod partikolari dawk tal-postijiet ta' ħidma tal-Parlament Ewropew, Franza, il-Lussemburgu u l-Belġju. B'mod partikolari, l-assistent jipprepara, jappoġġa u jsegwi gruppi ta' ħidma mal-awtoritajiet nazzjonali u reġjonali fil-livell amministrattiv u politiku f'għadd ta' oqsma tal-attivitajiet tal-Parlament. Barra minn hekk l-assistent se:
- jabbozza korrispondenza, b'mod partikolari bil-Franċiż, mal-awtoritajiet reġjonali u nazzjonali inkluż dawk fl-ogħla livell,
- jieħu ħsieb il-ftehimiet ta' sħubija u l-viżitaturi,
- jieħu ħsieb l-assoċjazzjonijiet involuti fl-affarijiet Ewropej b'mod partikolari dawk fi Franza, il-Belġju, il-Lussemburgu u tar-reġjuni mal-fruntiera Ġermaniża.
F'dan il-kuntest, huma meħtieġa ħiliet organizzattivi sodi. Esperjenza preċedenti f'ambjent internazzjonali u speċjalment f'Parlament tkun ta' vantaġġ. Peress li l-pożizzjoni tinvolvi diversi kuntatti interni u esterni, huma meħtieġa ħiliet eċċellenti ta' kitba, sens diplomatiku żviluppat ferm, faċilità kbira ta' komunikazzjoni u ħiliet interpersonali tajbin ħafna.
Il-post huwa bbażat fi Brussells iżda jista' jiġi ttrasferit lejn wieħed mill-postijiet ta' ħidma l-oħra tal-Parlament. Jinvolvi vjaġġar regolari bejn it-tliet postijiet ta' ħidma tal-Parlament (Brussell, il-Lussemburgu u Strasburgu), kif ukoll fi bnadi oħra.
Il-funzjonijiet prinċipali se jinkludu dawn li ġejjin:
- Tħejjija, appoġġ u insegwiment tal-attivitajiet tal-gruppi ta' ħidma mal-awtoritajiet nazzjonali u reġjonali, b'mod partikolari dawk fi Franza, il-Lussemburgu u l-Belġju, filwaqt li dak li jkun jgħaddi informazzjoni lill-gradi superjuri u inferjuri tal-ġerarkija;
- Għemil ta' kuntatti u koordinazzjoni mal-awtoritajiet nazzjonali u reġjonali, b'mod partikolari dawk Franċiżi, Lussemburgiżi u Belġjani;
- Għoti ta' assistenza lill-gruppi ta' ħidma mal-awtoritajiet nazzjonali u reġjonali fid-diversi kompiti amministrattivi, b'mod partikolari l-abbozzar ta' minuti;
- Tħejjija, appoġġ għat-twettiq u l-konklużjoni ta' negozjati ta' ftehimiet amministrattivi mal-awtoritajiet nazzjonali jew reġjonali, kif ukoll l-assoċjazzjonijiet involuti fl-affarijiet Ewropej, b'mod partikolari dawk Franċiżi, Lussemburgiżi u Belġjani u dawk tar-reġjuni mal-fruntiera Ġermaniża;
- Kumpilazzjoni ta' fajls skont proċeduri stabbiliti, f'forma ta' karta jew elettronika, u għoti ta' fajls finalizzati b'informazzjoni ġenerali rilevanti lill-awtoritajiet tat-teħid ta' deċiżjonijiet, jekk ikun hemm bżonn;
- Insegwiment tad-deċiżjonijiet, għoti ta' informazzjoni b'risposta għal mistoqsijiet dwar il-progress fil-każijiet, tfassil ta' rendikonti, ħafna drabi bi skadenzi qosra;
- Organizzazzjoni ta' żjarat, ilqugħ tal-viżitaturi u twettiq ta' kompiti oħra speċifiċi fi ħdan il-qasam ta' attività tad-dipartiment.
Dawn il-funzjonijiet jirrikjedu l-ħiliet li ġejjin:
- Ħiliet ta' organizzazzjoni u ppjanar
- Ħiliet analitiċi u ta' komprensjoni
- Approċċ metikoluż
- Ħiliet interpersonali u ta' networking
- Kunfidenzjalità/diskrezzjoni
- Kapaċità li wieħed jipproduċi riżultati taħt pressjoni ta' ħin
- Tattika u diplomazija
3. Eliġibbiltà
Fid-data tal-iskadenza stabbilita għat-tressiq tal-applikazzjonijiet, il-kandidati jeħtiġilhom jissodisfaw dawn il-kondizzjonijiet li ġejjin:
(a) Rekwiżiti ġenerali
Skont l-Artikolu 12(2) tal-Kondizzjonijiet tal-Impjieg ta' Aġenti Oħra tal-Unjoni Ewropea, il-kandidati jridu:
- ikunu ċittadin ta' wieħed mill-Istati Membri tal-Unjoni Ewropea,
- igawdu d-drittijiet kollha bħala ċittadini,
- ikunu ssodisfaw kull obbligu impost fuqhom mil-liġijiet fir-rigward tas-servizz militari,
- jippreżentaw il-garanziji ta' moralità xierqa għall-qadi tal-funzjonijiet tagħhom.
(b) Kundizzjonijiet speċifiċi
(i) Kwalifiki u ħiliet meħtieġa
Il-kandidati jeħtieġ li jkollhom:
- livell ta' edukazzjoni postsekondarja ċċertifikat b'diploma,
jew
- livell ta' edukazzjoni sekondarja ċċertifikat b'diploma li tagħti aċċess għall-edukazzjoni postsekondarja, segwita minn esperjenza professjonali ta' mill-inqas tliet snin rilevanti għall-funzjonijiet. Dawn it-tliet snin ta' esperjenza mhux se jitqiesu għall-evalwazzjoni tal-esperjenza professjonali meħtieġa hawn taħt.
Il-kumitat ta' selezzjoni se jqis id-differenzi bejn is-sistemi edukattivi tal-Istati Membri. Eżempji tal-kwalifiki minimi meħtieġa jinsabu fit-tabella inkluża fil-Gwida għall-Kandidati tal-proċeduri ta' selezzjoni organizzati mill-Parlament Ewropew.
(ii) Esperjenza professjonali meħtieġa
Wara li tkun ksibt il-kwalifiki speċifikati hawn fuq, irid ikollok mill-inqas ħames snin esperjenza professjonali rilevanti għall-funzjonijiet speċifikati fit-taqsima A.2. Esperjenza preċedenti f'ambjent internazzjonali u speċjalment f'Parlament tkun ta' vantaġġ.
(iii) Għarfien lingwistiku
Il-kandidati għandu jkollhom għarfien fil-fond (livell C1) ta' waħda mil-lingwi uffiċjali tal-Unjoni Ewropea (lingwa 1): il-Bulgaru, iċ-Ċek, id-Daniż, l-Estonjan, il-Finlandiż, il-Franċiż, il-Ġermaniż, il-Grieg, l-Ingliż, l-Irlandiż, l-Ispanjol, l-Iżvediż, il-Kroat, il-Latvjan, il-Litwan, il-Malti, l-Olandiż, il-Pollakk, il-Portugiż, ir-Rumen, is-Slovakk, is-Sloven, it-Taljan u l-Ungeriż,
u
għarfien komplut (level C1) tal-Franċiż (lingwa 2). Il-lingwa 2 trid tkun differenti mil-lingwa 1. Fil-każ li l-lingwa 1 tkun il-Franċiż, huwa meħtieġ għarfien sodisfaċenti (livell B2) ta' waħda mit-23 lingwa uffiċjali oħra tal-Unjoni Eworpea.
Għarfien tal-Ġermaniż u/jew tal-Olandiż huwa ta' vantaġġ.
Jekk jogħġbok innota li l-livelli minimi mitluba hawn fuq japplikaw għal kull qasam ta' kapaċità lingwistika (id-diskors, il-kitba, il-qari u s-smigħ) imsemmi fil-formola ta' applikazzjoni. Dawn il-kapaċitajiet jikkorrispondu għal dawk speċifikati fil-Qafas Komuni Ewropew ta' Referenza għal-Lingwi (https://europa.eu/europass/mt/common-european-framework-reference).
L-applikanti huma infurmati li r-rekwiżit tal-lingwa speċifika mitlub, jiġifieri għarfien tajjeb ferm tal-Franċiż, ġie stabbilit fl-interess tas-servizz b'rispett għar-rekwiżiti speċifiċi tal-post.
B'mod aktar speċifiku, il-Franċiż huwa l-lingwa prinċipali ta' komunikazzjoni mal-awtoritajiet nazzjonali u reġjonali fit-tliet stati ospitanti tal-postijiet ta' ħidma tal-Parlament Ewropew, Franza, il-Belġju u l-Lussemburgu u waħda mill-lingwi l-aktar użati fil-komunikazzjoni interna tal-Parlament Ewropew. Konsegwentement, sabiex iwettaq il-funzjonijiet tiegħu kif imsemmi fit-Taqsima A. 2 ta' dan l-avviż ta' reklutaġġ u biex jiżgura l-funzjonament bla ntoppi tas-servizz, l-aġent temporanju rreklutat għandu jkun kapaċi jaħdem u jikkomunika b'mod effettiv bil-Franċiż.
Għarfien tal-Ġermaniż u/jew tal-Olandiż huwa ta' vantaġġ, minħabba li l-Olandiż jista' jkun bżonjuż fil-komunikazzjoni mal-awtoritajiet Belġjani u l-Ġermaniż fil-komunikazzjoni mal-awtoritajiet Lussemburgiżi u l-assoċjazzjonijiet involuti fl-affarijiet Ewropej tar-reġjuni mal-fruntiera Ġermaniża.
Barra minn hekk, fl-interess ta' trattament ugwali, il-kandidati kollha, anke jekk ikollhom il-Franċiż bħala l-ewwel lingwa uffiċjali tagħhom, huma mitluba jkollhom għarfien sodisfaċenti tat-tieni lingwa, li trid tkun waħda mil-lingwi uffiċjali l-oħra tal-Unjoni Ewropea.
B. ŻVOLĠIMENT TAL-PROĊEDURA
1. Eleġibilità għall-proċedura ta' selezzjoni
Il-proċedura hija organizzata abbażi ta' kwalifiki u testijiet.
Jekk inti
- tissodisfa r-rekwiżiti ġenerali ta' eleġibilità u
- ressaqt l-applikazzjoni tiegħek bi qbil mal-arranġamenti speċifikati u mhux aktar tard mid-data tal-iskadenza,
il-kumitat ta' selezzjoni se jivvaluta l-applikazzjoni tiegħek fid-dawl tar-rekwiżiti speċifiċi ta' eleġibilità.
Jekk tissodisfa r-rekwiżiti speċifiċi ta' eleġibilità, inti tkun eleġibbli għall-proċedura ta' selezzjoni.
Il-kumitat ta' selezzjoni se jibbaża d-deċiżjonijiet tiegħu esklużivament fuq l-informazzjoni mogħtija fil-formola tal-applikazzjoni u li tkun appoġġata minn dokumenti ġustifikattivi (għal aktar dettalji, ara l-Gwida għall-Kandidati tal-proċeduri ta' selezzjoni organizzati mill-Parlament Ewropew).
2. Evalwazzjoni tal-kwalifiki
Il-kumitat ta' selezzjoni, abbażi ta' tabella tal-marki li jkun stabbilixxa minn qabel, iwettaq evalwazzjoni tal-kwalifiki tal-kandidati eleġibbli għall-proċedura ta' selezzjoni u jistabbilixxi lista tal-aħjar 12-il kandidat li jiġu mistiedna għat-testijiet bil-miktub.
Il-kumitat ta' selezzjoni, huwa u jwettaq evalwazzjoni tal-kwalifiki tal-kandidati, iqis b'mod partikolari l-aspetti li ġejjin (li għandhom ikunu appoġġati minn dokumenti ġustifikattivi mehmuża mal-fajl tal-applikazzjoni):
- kwalifiki u diplomi addizzjonali u r-rabta tagħhom mal-funzjonijiet;
- esperjenza fil-kumpilazzjoni ta' dossiers;
- esperjenza fl-abbozzar ta' ittri, noti, rendikonti u minuti bil-Franċiż;
- esperjenza fil-koordinazzjoni mal-awtoritajiet nazzjonali u reġjonali;
- esperjenza fl-assistenza ta' kompiti amministrattivi u fis-segwitu ta' deċiżjonijiet;
- esperjenza professjonali miksuba f'ambjent multikulturali u multinazzjonali.
Punteġġ: minn 0 sa 20 punt.
3. Testijiet
Test bil-miktub
a) Test ta' abbozzar bil-Franċiż, abbażi ta' sett ta' dokumenti, maħsub biex jivvaluta l-kapaċità tiegħek li twettaq il-funzjonijiet deskritti fit-Taqsima A.2 u li tifhem ir-rekwiżiti kummerċjali, tipprovdi soluzzjonijiet u appoġġ lill-utenti finali
Tul tat-test: 90 minuta
Punteġġ: minn 0 sa 20 punt (minimu meħtieġ: 10 punti).
It-test jista' jiġi organizzat b'mod remot u online (ibbażat fuq il-kompjuter).
Is-sitt kandidati li jkunu kisbu l-ogħla marki fit-test bil-miktub jiġu mistiedna għat-testijiet orali, bil-kondizzjoni li jkunu kisbu l-marka minima meħtieġa.
Testijiet orali
b) Intervista mal-kumitat ta' selezzjoni bil-Franċiż, sabiex, b'kunsiderazzjoni tal-informazzjoni kollha mniżżla fil-fajl tal-applikazzjoni tiegħek, tkun tista' tiġi vvalutata l-kapaċità tiegħek li twettaq il-funzjonijiet deskritti fit-Taqsima A.2. Il-kumitat ta' selezzjoni jista' jiddeċiedi li jittestja l-għarfien tal-lingwa tiegħek kif speċifikat fil-formola tal-applikazzjoni.
Tul tat-test: 45 minuta
Punteġġ: minn 0 sa 40 punt (minimu meħtieġ: 20 punt).
Dan it-test jista' jiġi organizzat b'mod remot u online (ibbażat fuq il-kompjuter).
c) Logħba tar-rwoli jew eżerċizzji fi grupp bil-Franċiż sabiex il-kumitat ta' selezzjoni jkun jista' jivvaluta l-ħiliet tiegħek ta' adattament u negozjar u l-ħiliet interpersonali.
Tul tat-test: 25 minuta
Punteġġ: minn 0 sa 20 punt (minimu meħtieġ: 10 punti).
Dan it-test jista' jiġi organizzat b'mod remot u online (ibbażat fuq il-kompjuter).
Se tirċievi struzzjonijiet dwar it-testijiet bil-miktub u orali fi żmien debitu. It-testijiet isiru fi żmien speċifiku f'data speċifika. Jekk ma tirrispondix għal invitazzjoni, ma tkunx tista' tiġi kkuntattjat bl-email jew ma tiġix għat-test, tiġi skwalifikat. Għandek issegwi l-istruzzjonijiet b'mod preċiż. Kull nuqqas li ssegwi l-istruzzjonijiet jew kull azzjoni li ma tkunx konformi mal-istruzzjonijiet tista' tirriżulta fi skwalifika immedjata.
4. Inklużjoni fil-lista ta' riżerva
Il-lista ta' riżerva se tinkludi, skont l-ordni ta' mertu, l-ismijiet tat-tliet kandidati li jkunu kisbu l-ogħla għadd ta' punti fil-proċedura kollha (l-evalwazzjoni tal-kwalifiki u t-testijiet) u li jkunu laħqu l-livell minimu meħtieġ f'kull wieħed minn dawn it-testijiet.
Il-kandidati se jiġu infurmati individwalment bil-miktub dwar ir-riżultati tagħhom.
Il-lista ta' riżerva tiġi ppubblikata fuq l-intranet tal-Parlament Ewropew.
Il-lista ta' riżerva tibqa' valida sal-31 ta' Diċembru 2024; madankollu, tista' tiġi estiża. F'dan il-każ, il-kandidati mniżżlin fil-lista ta' riżerva jiġu informati fi żmien debitu.
Jekk inti tirċievi offerta ta' impjieg, tkun mitlub tippreżenta l-kopji oriġinali tad-dokumenti kollha meħtieġa, inklużi diplomi u ċertifikati tal-impjieg, sabiex tkun tista' ssir verifika.
Il-fatt li ismek jitniżżel fil-lista ta' riżerva ma jikkostitwix dritt jew garanzija ta' reklutaġġ.
C. TRESSIQ TAL-APPLIKAZZJONIJIET
Biex tapplika, irid ikollok kont fuq il-pjattaforma Apply4EP: https://apply4ep.gestmax.eu/search/index/lang/mt_MT. Tista' toħloq kont WIEĦED biss. Biex tagħmel dan, ikklikkja fuq il-buttuna "Applika online" f'qiegħ il-paġna.
Qabel ma timla l-formola tal-applikazzjoni, jekk jogħġbok aqra sew il-Gwida għall-Kandidati tal-proċeduri ta' selezzjoni organizzati mill-Parlament Ewropew u pprovdi d-dokumenti ġustifikattivi rilevanti.
L-iskadenza għall-applikazzjonijiet hija
12.00 (nofsinhar), ħin ta' Brussell, it-30 ta' Settembru 2021.
Tirċievi konferma awtomatika tal-wasla eżatt wara li l-formola tal-applikazzjoni tiegħek tiġi vvalidata.
Jekk jogħġbok IĊĊEMPILX rigward il-kalendarju tal-proċedura.
Lura għal-lista