PROGRAMM TA’ AZZJONI POŻITTIVA 2024
Jekk tiltaqa’ ma’ kwalunkwe diffikultà fl-aċċessibbiltà inti u timla l-formola tal-applikazzjoni fuq APPLY4EP, jekk jogħġbok ikkuntattjana minnufih permezz ta’ APPLY4EP jew tal-indirizz elettroniku tagħna
PERS-APPLY4EPContacts@europarl.europa.eu.
Introduzzjoni
Għall-għaxar sena konsekuttiva, il-Parlament Ewropew qed iniedi l-Programm ta’ Azzjoni Pożittiva (PAP) (edizzjoni tal-2024), li huwa perkors addizzjonali mfassal biex jiffaċilita l-impjieg ta’ persuni b’diżabbiltà bħala aġenti kuntrattwali. Din l-inizjattiva toffri lill-kandidati b’diżabbiltà l-opportunità li jaħdmu mal-unika istituzzjoni tal-UE eletta direttament u tippermetti lill-Parlament jiżgura ġabra ta’ talenti diversi billi jattira kandidati kompetenti.
Il-proċedura PAP tikkonsisti fl-istabbiliment ta’ lista ta’ riżerva ta’ 20 kandidat idonew għar-reklutaġġ potenzjali bħala aġenti kuntrattwali (abbażi tal-Artikolu 3b tal-Kundizzjonijiet tal-Impjieg ta’ Aġenti Oħra tal-Unjoni Ewropea) fil-grupp ta’ funzjonijiet II, III jew IV mid-Direttorati Ġenerali (DĠ) tas-Segretarjat. Kull sena matul dan il-programm, il-Parlament jirrekluta sa sitt kandidati li jirnexxu, li jirċievu kuntratti ta’ sena (bil-possibbiltà li jiġġeddu). Il-bqija tal-kandidati li jirnexxu se jiġu inklużi f’lista ta’ riżerva għal perjodu ta’ 18-il xahar, bil-possibbiltà li jiġu reklutati mid-Direttorati Ġenerali tal-Parlament, barra mill-qafas tal-PAP.
Kriterji ta’ eleġibbiltà
Fid-data tal-iskadenza għat-tressiq tal-applikazzjonijiet, jeħtieġlek tissodisfa dawn il-kriterji ta’ eleġibbiltà:
(a) Rekwiżiti ġenerali
(1) irid ikollok diżabbiltà li tikkawża insuffiċjenza ta’ 20% jew aktar skont l-Iskala Ewropea tal-Klassifikazzjoni tad-Diżabbiltà Fiżika u Mentali;
(2) trid tgawdi d-drittijiet kollha bħala ċittadin ta’ Stat Membru tal-UE;
(3) trid tkun issodisfajt kull obbligu impost mil-liġijiet dwar is-servizz militari;
(4) trid tkun tista’ tipproduċi r-referenzi dwar il-karattru xierqa fir-rigward tal-ideoneità tiegħek għat-twettiq ta’ dmirijietek;
(5) irid ikollok livell minimu ta’ C1 (“għarfien komplut”) f’waħda mill-24 lingwa uffiċjali tal-UE (lingwa 1); irid ikollok livell minimu ta’ B2 (“għarfien sodisfaċenti”) f’lingwa oħra tal-UE (lingwa 2), abbażi tal-Qafas Komuni Ewropew ta’ Referenza għal-Lingwi.
Il-lingwi uffiċjali tal-Unjoni Ewropea huma: il-Bulgaru, iċ-Ċek, id-Daniż, l-Estonjan, il-Finlandiż, il-Franċiż, il-Ġermaniż, il-Grieg, l-Ingliż, l-Irlandiż, l-Ispanjol, l-Iżvediż, il-Kroat, il-Latvjan, il-Litwan, il-Malti, l-Olandiż, il-Pollakk, il-Portugiż, ir-Rumen, is-Slovakk, is-Sloven, it-Taljan u l-Ungeriż,
It-test b’mistoqsijiet b’għażla multipla (MCQ) tagħmlu fil-lingwa 1 tiegħek. Is-servizzi ta’ reklutaġġ jittestjaw l-għarfien tiegħek tat-tieni lingwa fil-fażi tal-intervista, jekk ismek jiġi inkuż fil-lista ta’ riżerva u tkun mistieden għal intervista minn DĠ.
Billi tapplika għal dan il-programm, tkun qed tiddikjara speċifikament li tissodisfa l-kriterju (a)(1) hawn fuq. Jekk tipprovdi informazzjoni falza fir-rigward ta’ dan il-kriterju ta’ eleġibbiltà l-applikazzjoni tiegħek tiġi kkanċellata minnufih u tiġi eskluż(a) mill-programm.
(b) Kwalifiki
Irid ikollok ukoll:
Għall-gruppi ta’ funzjonijiet II (Klerikali u Segretarjali) u III (Assistenti):
- livell ta’ edukazzjoni postsekondarja ċċertifikat b’diploma; jew
- livell ta’ edukazzjoni sekondarja ċċertifikat b’diploma li jagħti aċċess għall-edukazzjoni postsekondarja, u esperjenza professjonali xierqa ta’ mill-inqas tliet snin;
- jew, fejn ikun iġġustifikat fl-interess tas-servizz, taħriġ professjonali jew esperjenza professjonali ta’ livell ekwivalenti.
Għall-grupp ta’ funzjonijiet IV (Amministraturi):
- livell ta’ edukazzjoni li jikkorrispondi għal studji universitarji kompluti ta’ mill-inqas tliet snin iċċertifikati b’diploma;
- jew, fejn ikun iġġustifikat fl-interess tas-servizz, taħriġ professjonali ta’ livell ekwivalenti.
Id-diplomi, kemm jekk maħruġa fi Stat Membru jew f’pajjiż mhux tal-UE, iridu jiġu rikonoxxuti minn korp uffiċjali ta’ Stat Membru tal-UE, bħall-ministeru tal-edukazzjoni.
Jekk għandek diplomi maħruġa minn pajjiż mhux tal-UE, jeħtieġlek tipprovdi dikjarazzjoni ta’ ekwivalenza tal-UE għal dawn id-diplomi. Tista’ ssib aktar informazzjoni dwar ir-rikonoxximent ta’ kwalifiki mhux tal-UE fin-networks ENIC-NARIC (https://www.enic-naric.net).
Il-panel ta’ selezzjoni se jqis id-differenzi fis-sistemi edukattivi. It-tabella fil-Gwida għall-Kandidati tipprovdi eżempji tal-kwalifiki minimi meħtieġa.
(c) Esperjenza professjonali
Il-programm huwa miftuħ biss għal individwi li ma jkunu qatt qabel ħadmu f’istituzzjoni, f’aġenzija jew f’korp tal-UE (għall-fini ta’ dan il-programm, it-traineeships u l-kuntratti interim tal-UE ma jgħoddux bħala esperjenza ta’ xogħol preċedenti għal istituzzjoni tal-UE).
Proċedura ta’ Selezzjoni u Reklutaġġ
(1) Proċedura ta’ Selezzjoni
Il-Parlament Ewropew se jistiednek tagħmel test b’mistoqsijiet b’għażla multipa (MCQ) ibbażat fuq il-kompjuter, li jikkonsisti f’massimu ta’ 30 mistoqsija li jappartjenu għall-oqsma li ġejjin: għarfien dwar l-UE, raġunament verbali u valutazzjoni sitwazzjonali.
Jekk tirrikjedi akkomodament raġonevoli matul it-test, tista’ tippreżenta talba billi tuża l-formola pprovduta. Mal-formola ta’ talba għandek tehmeż ċertifikat reċenti mill-awtorità nazzjonali tiegħek jew ċertifikat mediku reċenti. Iċ-ċertifikat għandu jinkludi d-dijanjożi personali tiegħek u jispjega jew jikkonferma b’mod ċar is-sitwazzjoni jew il-kundizzjoni tiegħek, kif rikonoxxuta mis-sistema tas-saħħa nazzjonali tiegħek. Jekk applikabbli, iċ-ċertifikat għandu jinkludi l-perċentwal tal-insuffiċjenza (fiżika jew mentali) tiegħek. Il-formola kompluta u d-dokumenti ġustifikattivi kollha jridu jintbagħtu b’email lis-Servizz Mediku tal-Parlament Ewropew sal-iskadenza tal-applikazzjoni (għal aktar informazzjoni ara t-taqsima “Kif tapplika” fil-gwida PAP). Din l-informazzjoni m’għandekx tibgħatha lill-Unità tas-Selezzjoni u t-Tfittxija ta’ Talenti.
Biex jagħmel it-testijiet online, il-Parlament Ewropew jaħdem ma’ fornitur ta’ servizzi (TestWe). Kun af li TestWe sfortunatament mhuwiex aċċessibbli b’mod diġitali. F’każ ta’ problema waqt it-test, jista’ jkun li jkollok bżonn tikkuntattja lill-helpline tal-fornitur ta’ servizzi bit-telefon. Jekk ikollok ħtiġijiet speċifiċi, se jsiru arranġamenti alternattivi (pereżempju, jekk ikollok insuffiċjenza fil-vista jew fis-smigħ jew disturb fid-diskors u/jew fil-lingwa), wara li s-Servizz Mediku japprova t-talba tiegħek. Il-kandidati idonei (dawk li jkunu laħqu l-marka minima ta’ 50 % fit-test MCQ u li l-punteġġ tagħhom jikklassifikahom mal-ewwel 20 kandidat) se jiffurmaw il-lista ta’ riżerva inizjali; din il-lista se tinkludi wkoll il-kandidati kollha li jkunu ġew ex aequo fl-aħħar post. Il-panel ta’ selezzjoni mbagħad se jevalwa dawn il-kandidati biex jiżgura li jkunu jissodisfaw il-kriterji ta’ eleġibbiltà (b) u (c) imsemmija hawn fuq.
Il-panel ta’ selezzjoni se jivvaluta l-fajl tal-applikazzjoni ta’ kull kandidat f’ordni dixxendenti tal-punti miksuba fit-test MCQ. Il-panel ta’ selezzjoni jwaqqaf il-proċess ta’ valutazzjoni ladarba jkun intlaħaq l-għadd massimu ta’ kandidati idonei. Il-panel ta’ selezzjoni jpoġġi fil-lista l-kandidati kollha li jkunu ġew ex aequo fl-aħħar post ta’ klassifikazzjoni.
F’dan l-istadju, ikun meħtieġ ukoll li tgħaddi mill-proċess tar-rikonoxximent tad-diżabbiltà tal-Parlament. Biex id-diżabbiltà tiegħek tiġi attestata, qis li tabib mediku (jew speċjalista jew il-prattikant ġenerali tiegħek) jiffirmalek il-formola pprovduta mis-Servizz Mediku tal-Parlament. Bħala prova biex tiġġustifika l-applikazzjoni tiegħek, tista’ tipprovdi wkoll kard nazzjonali tad-diżabbiltà. Għandu jkollok din l-informazzjoni lesta f’qasir żmien sabiex is-Servizz Mediku jipproċessaha wara t-test MCQ. Tajjeb li tkun taf li dan il-proċess huwa differenti mill-evalwazzjoni tat-talba tiegħek għal akkomodament raġonevoli deskritta hawn fuq.
(2) Reklutaġġ
Ladarba l-lista tal-20 kandidat idonew tkun finalizzata, is-CVs tagħhom jiġu ċċirkolati mas-servizzi tar-riżorsi umani tad-Direttorati Ġenerali kollha. Fost dawn il-kandidati, sa sitta se jiġu reklutati fil-qafas tal-PAP, filwaqt li l-bqija tal-kandidati jistgħu jiġu kkunsidrati biex jiġu reklutati bħala aġenti kuntrattwali mid-Direttorati Ġenerali, barra mill-qafas tal-PAP.
Jekk DĠ iqis li l-profil tiegħek ikun interessanti, jista’ jistiednek għal intervista.
Huwa importanti li tinnota li l-fatt li tiġi inkluż(a) fil-lista ta’ riżerva jew li tgħaddi t-test ta’ selezzjoni ma jagħti ebda dritt ta’ reklutaġġ. Is-servizzi ta’ reklutaġġ jistgħu jirreferu għal-lista meta jsiru disponibbli pożizzjonijiet b’kuntratt billi lill-kandidati li l-profili tagħhom jallinjaw mar-rekwiżiti tal-impjieg jistednuhom għal intervista. Dan il-proċess għandu l-għan li joħloq opportunitajiet kemm fil-qafas tal-PAP kif ukoll barra minnu.
Kif tista’ tapplika?
Jekk jogħġbok applika permezz tal-pjattaforma Apply4EP sal-iskadenza, nhar it-18 ta’ Marzu 2024 fil-17.00 (ħin ta’ Brussell/il-Lussemburgu).
Qabel ma timla l-formola tal-applikazzjoni tiegħek, aqra bir-reqqa l-Gwida għall-Kandidati li hija annessa ma’ dan l-avviż.
(1) Imla l-formola tal-applikazzjoni u pprovdi d-dokumenti ġustifikattivi rilevanti permezz tal-pjattaforma Apply4EP:
- is-CV tiegħek;
- id-diploma(i) prova tal-livell ta’ edukazzjoni tiegħek;
- prova ta’ esperjenza preċedenti tax-xogħol (jekk kellek xi esperjenza);
Tinsiex tikklikkja, jekk rilevanti, il-kaxxa fuq Apply4EP li tiddikjara li tirrikjedi akkomodament raġonevoli għat-test.
(2) Ibgħat b’email il-formola ta’ akkomodament raġonevoli (verżjoni vojta tagħha hija mehmuża mal-avviż taħt “Anness I”) sal-iskadenza tal-applikazzjoni lis-servizz mediku fl-indirizz li ġej:
PERS-CabmedbruDisability@europarl.europa.eu
Jekk jogħġbok ehmeż id-dokumentazzjoni medika xierqa biex tiġġustifika t-talba għal akkomodament raġonevoli tiegħek (ċertifikati mediċi, noti tat-tabib, prova ta’ akkomodamenti raġonevoli preċedenti, bħal kwalunkwe akkomodament għal eżamijiet mogħtija qabel matul l-edukazzjoni tiegħek, eċċ.) sal-iskadenza tal-applikazzjoni.
Jekk jogħġbok uża l-formulazzjoni li ġejja fil-linja tas-suġġett tal-email:
‘DG PERS 2024 Positive Action Programme/RA Testing Justification Note’.
Tajjeb li tkun taf li akkomodamenti raġonevoli għall-post tax-xogħol se jiġu offruti lill-kandidati reklutati fi stadju aktar tard.
Back to the list