PE/277/S/EPRS - AĠENT TEMPORANJU - AMMINISTRATUR / AMMINISTRATRIĊI KURATUR / KURATRIĊI TAL-LIBRERIJI MIFTUĦIN GĦALL-PUBBLIKU (ANALISTA TEMATIKU/A) (AD 7)

Qabel tapplika, jekk jogħġbok aqra sew il-gwida għall-kandidati annessa ma' dan l-avviż ta' reklutaġġ.

Din il-gwida, li hija parti integrali mill-avviż ta' reklutaġġ, tgħinek tifhem ir-regoli marbuta mal-proċeduri u l-kondizzjonijiet tal-parteċipazzjoni.

WERREJ

A.  FUNZJONIJIET U ELEĠIBILITÀ

B.  PROĊEDURA

C.  TRESSIQ TAL-APPLIKAZZJONIJIET

ANNESS: GWIDA GĦALL-KANDIDATI FIL-PROĊEDURI TA' SELEZZJONI ORGANIZZATI MILL-PARLAMENT EWROPEW

A.FUNZJONIJIET U ELEĠIBILITÀ

1. Kummenti ġenerali

Il-Parlament Ewropew iddeċieda li jniedi proċedura għall-pożizzjoni ta' aġent temporanju (AD 7).

Il-profil mitlub huwa dak ta' amministratur / amministratriċi kuratur / kuratriċi tal-libreriji miftuħin għall-pubbliku (analista tematiku/a) fi Brussell.

Il-kuntratt se jiġi konkluż għal żmien indeterminat. Ir-reklutaġġ se jsir fil-grad AD 7, l-ewwel skala, b'salarju bażiku ta' EUR 6 568,39 fix-xahar. Dan is-salarju huwa soġġett għat-taxxa Komunitarja u tnaqqis ieħor previst mill-Kondizzjonijiet tal-Impjieg ta' Aġenti Oħra tal-Unjoni Ewropea. Huwa eżenti mit-taxxa nazzjonali. L-iskala li fiha se tiġi reklutata l-persuna li tintgħażel madankollu tista' tiġi adattata skont l-esperjenza professjonali ta' din il-persuna. Barra minn hekk, is-salarju bażiku, f'ċerti kondizzjonijiet, jiżdied b'xi allowances.

Il-Parlament Ewropew japplika politika ta' opportunitajiet indaqs u jaċċetta l-applikazzjonijiet mingħajr ebda diskriminazzjoni, bħal pereżempju diskriminazzjoni bbażata fuq il-ġeneru, ir-razza, il-kulur, l-oriġini etnika jew soċjali, il-karatteristiċi ġenetiċi, il-lingwa, ir-reliġjon jew it-twemmin, l-opinjonijiet politiċi jew oħrajn, l-appartenenza għal minoranza nazzjonali, il-proprjetà, it-twelid, id-diżabilità, l-età, l-orjentament sesswali, l-istat ċivili jew is-sitwazzjoni tal-familja.

2. Deskrizzjoni tal-funzjonijiet

Id-Direttorat Ġenerali għas-Servizzi ta' Riċerka Parlamentari (EPRS) jipprovdi lill-Membri tal-Parlament Ewropew, lill-kumitati parlamentari tiegħu u lill-Parlament Ewropew inġenerali, analiżijiet indipendenti, oġġettivi u affidabbli kif ukoll elementi ta' riċerka dwar suġġetti politiċi differenti marbuta mal-Unjoni Ewropea.

Id-Direttorat għal-Librerija u l-Istrumenti tal-Għarfien tal-EPRS jipprovdi lill-Membri u lill-persunal tal-Parlament Ewropew għażla kbira ta' kotba stampati u diġitali, rivisti, ġurnali, messaġġi uffiċjali, bażijiet ta' data u sorsi ta' informazzjoni oħra rilevanti għall-aspetti kollha tal-ħidma tal-Parlament Ewropew bħala istituzzjoni. Filwaqt li jimpenja ruħu li jaqsam il-bażi ta' għarfien tiegħu mal-pubbliku ġenerali, id-Direttorat iwieġeb il-mistoqsijiet taċ-ċittadini u jkabbar gradwalment il-kollezzjonijiet miftuħin għal kulħadd biex jgħin lill-għalliema, lir-riċerkaturi u lil dawk kollha li juru interess fl-Unjoni Ewropea, l-istorja tagħha, il-memorji tagħha u l-politiki tagħha.

Fi ħdan dan id-Direttorat, l-Unità tal-Libreriji għaċ-Ċittadini hija tim ta' madwar 12-il kollega bbażati fi Brussell u fil-Lussemburgu. L-Unità tal-Libreriji għaċ-Ċittadini hija inkarigata mill-ħolqien ta' librerija pubblika multilingwi kbira, il-Librerija taċ-Ċittadini għall-Ewropa fi Brussell, tiġġestixxi l-librerija tal-Parlament fil-Lussemburgu fejn il-kollezzjonijiet storiċi diġà huma miftuħin għall-pubbliku, u bħalissa qed toħloq spazju ta' qari għall-viżitaturi fi Strażburgu. L-Unità tiżviluppa wkoll sħubijiet ma' libreriji pubbliċi tar-riċerka kbar, fl-Ewropa u barra l-Ewropa, u tiżviluppa sħubijiet ma' pjattaformi kbar oħra ta' qari pubbliku, bħal pereżempju Europeana. Fl-aħħar nett, is-servizz jikkonserva, jarrikkixxi u jivvalorizza l-kollezzjoni storika tal-Parlament Ewropew, li partijiet minnha jmorru lura għall-bidu tal-kostruzzjoni Ewropea fis-snin ħamsin.

L-Unità tal-Libreriji għaċ-Ċittadini tixtieq timpjega kuratur / kuratriċi tal-libreriji miftuħin għall-pubbliku (analista tematiku/a) fi Brussell.

Il-persuna reklutata tkun inkarigata minn dawn il-kompiti prinċipali:

F'kollaborazzjoni mill-qrib mad-direttur tal-kollezzjonijiet u l-kap tal-unità responsabbli:

• tikkontribwixxi għall-attivitajiet ta' akkwist, ta' konservazzjoni u ta' valorizzazzjoni tal-kollezzjonijiet tal-Libreriji għaċ-Ċittadini fit-tliet postijiet tax-xogħol u fis-siti kollha ta' qari aċċessibbli għall-viżitaturi, u fil-lingwi kollha tal-kollezzjonijiet;
• tikkontribwixxi għall-proċess finanzjarju għas-sejħiet għall-offerti, in-negozjati mal-fornituri ta' servizzi, il-kontroll tas-servizzi mogħtija;
• tikkontribwixxi għall-ħolqien u għall-arrikkiment tal-pjattaforma ta' qari pubbliku online;
• torganizza u tikkoordina l-wirjiet online u in situ u tiggarantixxi l-attivitajiet ta' segwitu;
• torganizza u tikkoordina l-offerta għall-viżitaturi in situ fid-diversi siti ta' qari pubbliku, b'kollaborazzjoni mal-librara, u tiggarantixxi l-attivitajiet ta' segwitu;
• torganizza u tikkoordina l-programm ta' eventi tas-siti ta' qari pubbliku, u tiggarantixxi l-attivitajiet ta' segwitu;
• tippromwovi fost il-pubbliku ġenerali u r-riċerkaturi l-kollezzjonijiet kollha tal-Libreriji għaċ-Ċittadini: kollezzjoni storika, kollezzjoni ġenerali, kollezzjoni dwar l-integrazzjoni Ewropea, pubblikazzjonijiet reċenti tal-Parlament Ewropew;
• tippromwovi fost il-pubbliku l-kollezzjonijiet multimedjali tal-Parlament Ewropew;
• torganizza korsijiet, konferenzi, interventi dwar il-memorji, il-postijiet u l-kollezzjonijiet tal-Parlament miftuħin għall-pubbliku;
• tipproduċi xogħlijiet dwar il-memorji, il-postijiet u l-kollezzjonijiet tal-Parlament miftuħin għall-pubbliku, tipproduċi xogħlijiet u torganizza seminars dwar il-memorji tal-Istituzzjoni, jekk ikun meħtieġ b'kollaborazzjoni mas-servizz storiku tal-Parlament Ewropew;
• tfassal briefings bi tweġiba għal mistoqsijiet tal-Membri dwar il-memorji, il-postijiet u l-kollezzjonijiet tal-Parlament Ewropew.

Dawn il-funzjonijiet jeħtieġu l-kompetenzi li ġejjin:

• għarfien eċċellenti tal-politiki pubbliċi Ewropej, tal-istorja tal-integrazzjoni Ewropea, tal-istituzzjonijiet Ewropej u, b'mod partikolari, tal-Parlament Ewropew;
• familjarità mar-riċerka kontemporanja dwar l-istorja u l-memorji tal-integrazzjoni Ewropea;
• għarfien ġenerali tal-ġestjoni finanzjarja u tal-qasam tal-swieq pubbliċi;
• familjarità mal-ġestjoni u l-konservazzjoni tas-sorsi ta' arkivji u ta' librerija f'kuntest multilingwi;
• esperjenza rikonoxxuta fl-organizzazzjoni ta' eventi, konferenzi u korsijiet li jivvalorizzaw patrimonju storiku u intellettwali, f'kuntest multilingwi;
• esperjenza fit-tqegħid online ta' eventi u sorsi diġitali, f'kuntest multilingwi;
• esperjenza murija fil-ġestjoni ta' proġetti;
• kapaċità rikonoxxuta ta' ħarrieġ, kelliem f'konferenzi, kittieb u editur;
• interazzjoni mal-awtoritajiet nazzjonali u lokali fit-tliet postijiet tax-xogħol;
• interazzjoni informali mal-interlokuturi naturali tal-Libreriji għaċ-Ċittadini: ir-riċerkaturi universitarji, id-diretturi tar-riċerka fl-istituzzjonijiet u lil hinn minnhom, id-diretturi tal-libreriji l-kbar, u oħrajn.

Il-ħolqien ta' Librerija taċ-Ċittadini għall-Ewropa fi Brussell, il-ġestjoni tal-librerija tal-Parlament fil-Lussemburgu, il-ħolqien ta' spazju tal-qari għall-viżitaturi fi Strażburgu u l-organizzazzjoni ta' eventi u wirjiet f'dawn is-siti ta' qari pubbliku jeħtieġu kuntatti frekwenti mal-awtoritajiet nazzjonali u reġjonali tat-tliet Stati li jospitaw il-Parlament Ewropew (Franza, il-Lussemburgu u l-Belġju). Il-pubbliku li għalih isiru l-wirjiet, it-taħriġ u s-seminars in situ jkun fil-biċċa l-kbira tiegħu pubbliku lokali ta' kull età: persuni li jitkellmu bil-Franċiż fi Brussell, fi Strażburgu u fil-Lussemburgu, persuni li jitkellmu bil-Ġermaniż fil-Lussemburgu u fi Strażburgu, u persuni li jitkellmu bl-Olandiż fi Brussell.

3. Rekwiżiti ta' eleġibilità

Sal-limitu ta' żmien stabbilit għat-tressiq tal-applikazzjonijiet, il-kandidati għandhom jissodisfaw ir-rekwiżiti li ġejjin:

(a) Rekwiżiti ġenerali

Skont l-Artikolu 12.2 tal-Kondizzjonijiet tal-Impjieg ta' Aġenti Oħra tal-Unjoni Ewropea, jeħtieġlek:

• tkun ċittadin(a) ta' wieħed mill-Istati Membri tal-Unjoni Ewropea;
• tgawdi mid-drittijiet ċivili tiegħek;
• tkun issodisfajt kull obbligu impost mil-liġijiet dwar is-servizz militari;
• toffri l-garanziji ta' moralità mitluba għall-eżerċizzju tal-funzjonijiet previsti.

(b) Rekwiżiti speċifiċi

(i) Kwalifiki u diplomi meħtieġa

Il-kandidati jeħtiġilhom ikollhom:

• livell ta' tagħlim li jikkorrispondi għal ċiklu sħiħ ta' studji universitarji rikonoxxut uffiċjalment f'wieħed mill-Istati Membri,

jew

• livell ta' tagħlim ta' mill-inqas tliet snin ta' studji universitarji ċċertifikati b'diploma rikonoxxuta uffiċjalment f'wieħed mill-Istati Membri, segwit minn esperjenza professjonali rilevanti ta' mill-inqas sena.

Id-diplomi, li jkunu ngħataw fi Stat Membru jew f'pajjiż barra mill-UE, iridu jkunu rikonoxxuti minn entità uffiċjali ta' Stat Membru tal-Unjoni, bħall-ministeru tal-edukazzjoni ta' Stat Membru tal-Unjoni.

Il-kumitat ta' selezzjoni se jqis, f'dan ir-rigward, id-differenzi fis-sistemi edukattivi. Eżempji tad-diplomi minimi meħtieġa jinsabu fit-tabella fil-gwida għall-kandidati.

L-esperjenza professjonali mitluba fit-tieni inċiż mhux se titqies għall-evalwazzjoni tal-esperjenza professjonali meħtieġa fil-punt A.3.(b) (ii).

(ii) Esperjenza professjonali meħtieġa

Minbarra l-kwalifiki meħtieġa fil-punt fil-punt A.3.(b) (i), il-kandidati jeħtiġilhom ikollhom mill-inqas sitt snin esperjenza professjonali f'qasam marbut man-natura tal-funzjonijiet imsemmija fil-punt A.2, li minnhom mill-inqas sentejn f'ambjent internazzjonali.

(iii) Għarfien lingwistiku

Il-kandidati jeħtiġilhom ikollhom għarfien komplut (livell minimu C1) ta' waħda mil-lingwi uffiċjali tal-Unjoni Ewropea (lingwa 1): il-Bulgaru, iċ-Ċek, id-Daniż, l-Estonjan, il-Finlandiż, il-Franċiż, il-Ġermaniż, il-Grieg, l-Ingliż, l-Irlandiż, l-Ispanjol, l-Iżvediż, il-Kroat, il-Latvjan, il-Litwan, il-Malti, l-Olandiż, il-Pollakk, il-Portugiż, ir-Rumen, is-Slovakk, is-Sloven, it-Taljan u l-Ungeriż,

u

għarfien komplut (livell minimu C1) tal-lingwa Franċiża (lingwa 2). Il-lingwa 2 trid tkun differenti mil-lingwa 1. F'każ li l-Franċiż ikun il-lingwa 1, għarfien sodisfaċenti (livell minimu B2) ta' waħda mit-23 lingwa uffiċjali l-oħra tal-Unjoni Ewropea huwa meħtieġ.

L-għarfien tal-Ġermaniż u/jew tal-Olandiż jirrappreżenta vantaġġ.

Ta' min ifakkar li l-livelli minimi indikati hawn fuq japplikaw għal kull qasam ta' ħila lingwistika (taħdit, kitba, komprensjoni orali, komprensjoni tal-kitba) imsemmija fil-formola tal-applikazzjoni. Dawn il-kapaċitajiet huma dawk inklużi fil-Qafas Komuni Ewropew ta' Referenza għal-Lingwi (https://europa.eu/europass/mt/common-european-framework-reference-language-skills).

B. PROĊEDURA

Il-proċedura hija organizzata abbażi ta' kwalifiki u testijiet.

1. Eleġibilità għall-proċedura ta' selezzjoni

Jekk

• tissodisfa r-rekwiżiti kollha ta' eleġibilità, u
• ippreżentajt il-fajl tiegħek skont il-modalitajiet u qabel l-iskadenza stabbiliti,

il-kumitat ta' selezzjoni jeżamina l-fajl tiegħek fir-rigward tar-rekwiżiti speċifiċi ta' eleġibilità.

Jekk tissodisfa r-rekwiżiti speċifiċi ta' eleġibilità, il-kumitat ta' selezzjoni jqisek eleġibbli għall-proċedura ta' selezzjoni.

Il-kumitat jibbaża esklużivament fuq l-informazzjoni mogħtija fil-formola tal-applikazzjoni li tkun appoġġata minn dokumenti ġustifikattivi.

2. Evalwazzjoni tal-kwalifiki

Abbażi ta' tabella ta' evalwazzjoni li tkun ġiet stabbilita minn qabel, il-kumitat ta' selezzjoni jevalwa l-kwalifiki tal-kandidati eleġibbli għall-proċedura ta' selezzjoni u jistabbilixxi lista tal-aħjar 12-il kandidat, li jiġu mistiedna għat-testijiet. Il-kumitat ta' selezzjoni jqis il-kandidati kollha ex aequo għall-aħħar post disponibbli.

Huwa u jevalwa l-kwalifiki tal-kandidati, il-kumitat ta' selezzjoni se jqis, b'mod partikolari, dawn l-elementi li ġejjin li għandhom ikunu ġġustifikati fil-formola tal-applikazzjoni: 

• kwalifiki u diplomi komplementari b'rabta mal-istorja tal-integrazzjoni Ewropea;
• esperjenza ta' xogħol fil-qasam tal-libreriji, inkluż f'termini ta' kontribut għall-katalgi;
• esperjenza ta' kuntatt mal-ambjent tal-libreriji l-kbar u tar-riċerkaturi universitarji;
• esperjenza miksuba fi ħdan u/jew ma' entitajiet politiċi;
• esperjenza fl-organizzazzjoni ta' wirjiet, simpożji u seminars;
• familjarità mal-media u s-settur tal-komunikazzjoni;
• għarfien diġitali.

Marka: minn 0 sa 20 punt.

3. Testijiet

Test bil-miktub

(a) Test tal-kitba bil-Franċiż, abbażi ta' fajl, maħsub biex jevalwa l-kapaċità tiegħek li twettaq il-funzjonijiet deskritti fit-Taqsima A.2, kif ukoll il-kapaċità tiegħek ta' kitba u ta' sinteżi.

Tul massimu tat-test: 3 sigħat.

Marka: minn 0 sa 40 punt (minimu meħtieġ: 20 punt).

Dan it-test se jiġi organizzat mill-bogħod fuq il-kompjuter.

Test orali

(b) Intervista mal-kumitat ta' selezzjoni bil-Franċiż, li permezz tagħha tkun tista' tiġi vvalutata l-kapaċità tiegħek li twettaq il-funzjonijiet deskritti fil-punt A.2, b'kunsiderazzjoni tal-elementi kollha mniżżlin fil-fajl tal-applikazzjoni. Il-kumitat ta' selezzjoni se jittestja wkoll il-lingwa li tkun iddikjarajt bħala l-lingwa 1 / bħala l-lingwa 2 jekk il-lingwa 1 tiegħek tkun il-Franċiż, u jista' jiddeċiedi li jittestja l-għarfien tiegħek tal-Olandiż u/jew tal-Ġermaniż, jekk tkun iddikjarajthom fil-formola tal-applikazzjoni.

Tul massimu tat-test: 45 minuta.

Marka: minn 0 sa 40 punt (minimu meħtieġ: 20 punt).

Dan it-test jista' jiġi organizzat mill-bogħod.

Se tirċievi fi żmien xieraq l-istruzzjonijiet dwar it-testijiet bil-miktub u orali. It-testijiet huma skedati f'data u f'ħin preċiżi. Jekk ma tirrispondix għall-istedina, jekk ma tkunx tista' tiġi kkuntattjat(a) permezz tal-email jew jekk ma tippreżentax ruħek għal test, tiġi skwalifikat(a). Jekk jogħġbok segwi kelma b'kelma l-istruzzjonijiet mogħtija. Jekk ma ssegwix l-istruzzjonijiet jew jekk l-imġiba tiegħek ma tkunx konformi mal-istruzzjonijiet, tiġi skwalifikat(a) minnufih.

4. Inklużjoni fil-lista tal-kandidati idonei

Il-lista tal-kandidati idonei tinkludi, skont l-ordni ta' mertu, l-ismijiet tat-tliet kandidati li jkunu kisbu l-ogħla għadd ta' punti fil-proċedura kollha (l-evalwazzjoni tal-kwalifiki u t-testijiet) u li jkunu laħqu l-livell minimu meħtieġ f'kull wieħed minn dawn it-testijiet. Il-lista tinkludi l-kandidati kollha ex aequo għall-aħħar post disponibbli.

Inti ssir taf personalment bir-riżultati tiegħek permezz ta' komunikazzjoni bil-miktub.

Il-lista tal-kandidati idonei tiġi ppubblikata fuq l-intranet tal-Parlament Ewropew.

Il-lista tal-kandidati idonei tibqa' valida sal-31 ta' Diċembru 2026. Din tista' tiġi estiża b'deċiżjoni tal-Awtorità tal-Ħatra. F'dan il-każ, il-kandidati mniżżlin fil-lista tal-kandidati idonei jiġu informati fi żmien xieraq.

Jekk tirċievi offerta ta' impjieg, inti tkun mitlub(a) tippreżenta l-kopji oriġinali tad-dokumenti kollha meħtieġa, b'mod partikolari d-diplomi u ċ-ċertifikati tal-impjieg tiegħek, sabiex tkun tista' ssir verifika.

Il-fatt li ismek jitniżżel fil-lista tal-kandidati idonei ma jikkostitwix dritt jew garanzija ta' reklutaġġ.

C. TRESSIQ TAL-APPLIKAZZJONIJIET

 Biex tapplika, irid ikollok kont fuq il-pjattaforma Apply4EP : https://apply4ep.gestmax.eu/search/index/lang/mt_MT. Jista' jkollok kont WIEĦED BISS. Biex tagħmel dan, ikklikkja fuq it-tab "Applika Online" li tinsab fi tmiem il-paġna.

Il-kandidati jeħtiġilhom jaqraw bir-reqqa l-gwida għall-kandidati QABEL ma jimlew l-applikazzjoni tagħhom.

Skadenza għat-tressiq tal-applikazzjonijiet

 Il-kandidati jeħtiġilhom japplikaw online fuq il-pjattaforma Apply4EP sa mhux aktar tard minn:

it-2 ta' Settembru 2022, f'12.00 (nofsinhar), ħin ta' Brussell

Il-kandidati huma mitluba MA JĊEMPLUX biex jiksbu informazzjoni dwar din il-proċedura ta' selezzjoni.

Tintbagħatlek konferma ta' riċevuta awtomatikament malli tivvalida l-formola tal-applikazzjoni tiegħek.