PROFESSJONIST TAL-LINGWAĠĠ ĊAR TAL-LINGWA INGLIŻA (AD 7) M/F

2. Deskrizzjoni tal-funzjonijiet

Id-Direttorat Ġenerali għat-Traduzzjoni (DĠ TRAD) jipprovdi servizzi ta' traduzzjoni lill-Parlament Ewropew biex jikkomunika fil-formati kollha, kemm stampati kif ukoll elettroniċi, bil-lingwi uffiċjali kollha tal-Unjoni Ewropea.

Id-dmirijiet tad-DĠ TRAD huma dawn li ġejjin:

• jiżgura d-disponibilità bil-lingwi uffiċjali kollha jew bil-lingwi ta' ħidma kollha tad-dokumenti kollha li huma relatati mar-rwol tal-Parlament bħala koleġiżlatur u bħala waħda miż-żewġ fergħat tal-awtorità baġitarja, sabiex jiggarantixxi l-leġittimità u t-trasparenza tal-proċess leġiżlattiv u baġitarju tal-Unjoni;
• jippermetti lill-Parlament jirrispetta l-impenji li timponilu l-politika tal-multilingwiżmu, li hi maħsuba biex tiggarantixxi t-trattament ugwali tal-lingwi u li permezz tagħha ċ-ċittadini kollha tal-Unjoni jkunu jistgħu jikkomunikaw mal-istituzzjonijiet u jkollhom id-dokumenti maħruġa mit-tali istituzzjonijiet bil-lingwa proprja tagħhom;
• jagħmel it-testi aktar sempliċi u faċli aktar biex jinqraw permezz ta' lingwaġġ ċar sabiex il-Parlament isir aktar aċċessibbli għaċ-ċittadini, inkluż permezz tal-użu ta' formati ġodda, li jikkorrispondu għal kif se jkun il-qari fil-futur;
• jassigura li s-servizzi kollha jiġu pprovduti bl-akbar effiċjenza.

Id-DĠ TRAD għandu l-missjoni li jibni pontijiet bejn il-lingwi u l-kulturi differenti u li jippromwovi l-multilingwiżmu sostenibbli, li huwa komponent essenzjali tal-ideal demokratiku Ewropew.

Ibbażati l-Lussemburgu u Brussell, il-professjonisti tal-lingwaġġ ċar għandhom ir-responsabilità li jiffaċilitaw il-komunikazzjoni maċ-ċittadini, li jwettqu editjar, adattamenti, sommarji u reviżjonijiet ta' kull tip ta' kontenut fil-limiti ta' żmien stabbiliti u li jagħtu pariri lingwistiċi bil-fomm u bil-miktub, pereżempju bit-telefon jew waqt laqgħat.

Il-kompitu prinċipali tal-kandidati magħżula jkun li jeditjaw firxa wiesgħa ta' testi mhux leġiżlattivi abbozzati bl-Ingliż u li jirrevedu x-xogħol ta' professjonisti oħra tal-lingwaġġ ċar u tat-trainees. Huma jipprovdu għajnuna fl-abbozzar bl-Ingliż u servizzi tal-lingwaġġ ċar lil awturi tal-Parlament Ewropew kollu. Bħala parti mit-tim ta' assistenza telefonika għal-lingwa Ingliża tas-servizz tagħhom, huma jipprovdu wkoll pariri dwar mistoqsijiet li jikkonċernaw il-lingwa Ingliża. Barra minn hekk, ikollhom il-possibilità li jikkontribwixxu għall-organizzazzjoni u t-tmexxija ta' workshops għall-kollegi tal-Parlament dwar l-użu korrett tal-Ingliż u żbalji li għandhom jiġu evitati, kif ukoll li jadattaw il-kontenut u jipproduċu sommarji bl-Ingliż għal finijiet ta' awdjo u oħrajn.

Is-suġġetti indirizzati huma fost oħrajn ta' natura politika, ġuridika, ekonomika, finanzjarja, xjentifika u teknika, li jkopru s-setturi ta' attività kollha tal-Unjoni Ewropea. It-twettiq ta' dawn il-kompiti jirrikjedi l-użu intensiv ta' għodod speċifiċi tal-IT u għodod relatati. Dan ix-xogħol jinvolvi wkoll il-medjazzjoni lingwistika u interkulturali b'rabta mal-produzzjoni u s-sottotitolar tal-kontenut awdjoviżiv bl-Ingliż.

Il-funzjoni ta' professjonist tal-lingwaġġ ċar titlob mill-kandidati sens qawwi ta' adattament, kif ukoll il-ħila li jittrattaw problemi differenti u li ta' spiss ikunu kumplessi, li jirreaġixxu malajr għall-bidliet fiċ-ċirkostanzi u li jikkomunikaw b'mod effiċjenti. Il-kandidati jeħtiġilhom ikunu kapaċi jaħdmu regolarment b'mod intensiv, kemm waħedhom kif ukoll f'tim, f'ambjent ta' xogħol multikulturali. Fl-aħħar, irid ikollhom l-interess li jkomplu t-taħriġ professjonali tagħhom matul il-karriera tagħhom.

3. Rekwiżiti ta' eleġibilità

Sal-limitu ta' żmien stabbilit għat-tressiq tal-applikazzjonijiet, jeħtieġlek tissodisfa r-rekwiżiti li ġejjin:

(a)     Rekwiżiti ġenerali

Skont l-Artikolu 28 tar-Regolamenti tal-Persunal għall-Uffiċjali tal-Unjoni Ewropea, inti jeħtieġlek:

–          tkun ċittadin ta' wieħed mill-Istati Membri tal-Unjoni Ewropea,

–          tgawdi mid-drittijiet ċivili tiegħek;

–          tkun issodisfajt kull obbligu impost mil-liġijiet dwar is-servizz militari;

–          toffri l-garanziji ta' moralità mitluba għat-twettiq tal-funzjonijiet previsti.

(b)     Rekwiżiti speċifiċi

i) Kwalifiki, diplomi u għarfien meħtieġa

(a) livell ta' edukazzjoni li jikkorrispondi għal ċiklu sħiħ ta' studji universitarji ċċertifikati b'diploma, meta l-perjodu normali ta' dawn l-istudji universitarji jkun ta' erba' snin jew aktar, 

jew

(b) livell ta' edukazzjoni li jikkorrispondi għal ċiklu sħiħ ta' studji universitarji ċċertifikati b'diploma flimkien ma' esperjenza professjonali xierqa ta' mill-anqas sena meta l-perjodu normali tal-istudji universitarji jkun għall-anqas ta' tliet snin.

Din l-esperjenza professjonali mhux se titqies waqt il-fażi ta' evalwazzjoni tal-kwalifiki meħtieġa taħt il-punt B.2.

Tista' tirreferi b'mod speċjali għall-Anness I tal-gwida għall-kandidati fil-proċeduri ta' selezzjoni organizzati mill-Parlament Ewropew.

(ii)     Għarfien lingwistiku

Irid ikollok ħakma tajba ta' mill-anqas tliet lingwi uffiċjali tal-Unjoni Ewropea. F'dan l-avviż ta' reklutaġġ, nirreferu għal-lingwi b'dan il-mod:

• lingwa 1(lingwa prinċipali): ħakma perfetta tal-Ingliż;
• lingwa 2(l-ewwel lingwa barranija): għarfien tajjeb ħafna ta' waħda mit-23 lingwa uffiċjali tal-Unjoni Ewropea; trid tkun differenti mil-lingwa 1 u mil-lingwa 3;
• lingwa 3 (it-tieni lingwa barranija): għarfien tajjeb ħafna ta' waħda mit-23 lingwa uffiċjali tal-Unjoni Ewropea; trid tkun differenti mil-lingwa 1 u mil-lingwa 2.

(iii)   Esperjenza professjonali meħtieġa

Jeħtieġlek tkun ksibt, wara l-kwalifiki meħtieġa fil-punt A.3.(b)(i), esperjenza professjonali ta' tul minimu ta' 5 snin, fit-traduzzjoni tat-testi u tal-kontenut awdjoviżiv u/jew is-sottotitolar, l-adattament tat-testi, l-editjar, ir-reviżjoni u/jew il-posteditjar.

Għal din il-proċedura ta' selezzjoni, l-għażla tal-lingwa 1 u r-rekwiżit tal-għarfien tat-tielet lingwa ġew definiti skont l-interess tas-servizz. Fil-fatt, il-pożizzjoni ta' professjonist tal-lingwaġġ ċar tal-lingwa Ingliża teżiġi kwalifiki speċjali minħabba n-natura tal-funzjonijiet, kif imsemmija fil-punt A.2 ta' dan l-avviż ta' reklutaġġ.

B'konsegwenza ta' dan, bil-għan li jwettqu l-funzjonijiet tagħhom u jiżguraw il-funzjonament tajjeb tas-servizz tad-DĠ TRAD, il-persuni rreklutati jeħtiġilhom ikunu kapaċi jaħdmu u jikkomunikaw b'effiċjenza bi tliet lingwi.

B. ŻVOLĠIMENT TAL-PROĊEDURA

1. Eleġibilità għall-proċedura ta' selezzjoni

Il-proċedura hija organizzata abbażi ta' kwalifiki u testijiet.

Jekk

• tissodisfa r-rekwiżiti ġenerali ta' eleġibilità,
• ippreżentajt il-fajl tiegħek skont il-modalitajiet u qabel l-iskadenza stabbiliti,

l-applikazzjoni tiegħek tintbagħat mill-Awtorità tal-Ħatra lill-kumitat ta' selezzjoni, li jeżamina l-fajl tiegħek.

Jekk tissodisfa r-rekwiżiti speċifiċi ta' eleġibilità, il-kumitat ta' selezzjoni jqisek eleġibbli għall-proċedura ta' selezzjoni.

Il-kumitat jibbaża l-għażla tiegħu esklużivament fuq l-informazzjoni mogħtija fil-formola tal-applikazzjoni li tkun appoġġjata mid-dokumenti ġustifikattivi rilevanti mehmuża mal-formola tal-applikazzjoni (għal aktar dettalji, ara l-gwida għall-kandidati).

2. Evalwazzjoni tal-kwalifiki

Abbażi ta' tabella ta' evalwazzjoni li tkun ġiet stabbilita minn qabel, il-kumitat ta' selezzjoni jivvaluta l-kwalifiki tal-kandidati eleġibbli għall-proċedura ta' selezzjoni u jistabbilixxi lista tal-aħjar 50 kandidat, li jiġu mistiedna għat-testijiet bil-miktub.

Waqt l-evalwazzjoni tal-kwalifiki tal-kandidati, il-kumitat ta' selezzjoni jqis, b'mod partikolari, dawn l-elementi li ġejjin, li jridu jkunu appoġġjati mid-dokumenti ġustifikattivi rilevanti mehmuża mal-formola tal-applikazzjoni:

- il-kwalifiki u d-diplomi addizzjonali b'rabta mal-funzjonijiet;

- l-għarfien ta' lingwi uffiċjali oħra tal-Unjoni Ewropea;

- l-esperjenza professjonali fil-qasam tal-abbozzar ta' testi maħsuba għall-pubblikazzjoni;

- l-esperjenza professjonali fil-qasam tal-editjar tat-testi jew fl-abbozzar ta' sommarji;

- l-esperjenza professjonali f'qasam lingwistiku (pereżempju t-traduzzjoni, l-interpretazzjoni, is-sottotitolar, eċċ.);

- l-esperjenza professjonali fil-qasam tal-komunikazzjoni f'lingwaġġ ċar;

- l-esperjenza professjonali f'ambjent multikulturali u multilingwi.

Punteġġ: minn 0 sa 20 punt.

3. Testijiet

Testijiet bil-miktub

(a)     Test ta' editjar bl-Ingliż: editjar ta' test dwar l-attivitajiet leġiżlattivi tal-Parlament Ewropew. L-objettiv ta' dan it-test huwa li jevalwa l-ħiliet ta' editjar tiegħek biex twettaq id-dmirijiet involuti, b'mod partikolari l-ħakma perfetta tiegħek tal-konvenzjonijiet stilistiċi tal-lingwa Ingliża u l-attenzjoni għad-dettall.

Tul massimu tat-test: 60 minuta.

Punteġġ: minn 0 sa 40 punt - Minimu meħtieġ: 20/40

(b)     Test tal-abbozzar bl-Ingliż: abbozzar bl-Ingliż ta' sommarju maħsub għaċ-ċittadini, ta' stqarrija għall-istampa jew minn silta ta' studju fil-lingwa 2. L-objettiv ta' dan it-test huwa li jevalwa l-għarfien tiegħek tal-lingwa 2, u l-kapaċità tiegħek li tidentifika l-punti prinċipali ta' test u li tiktibhom fil-qosor f'lingwaġġ ċar.

Tul massimu tat-test: 30 minuta.

Punteġġ: minn 0 sa 40 punt - Minimu meħtieġ: 20/40

(c)     Test tal-abbozzar bl-Ingliż: abbozzar bl-Ingliż ta' sommarju maħsub għaċ-ċittadini, ta' stqarrija għall-istampa jew silta ta' studju fil-lingwa 3. L-objettiv ta' dan it-test huwa li jevalwa l-għarfien tiegħek tal-lingwa 3, u l-kapaċità tiegħek li tidentifika l-punti prinċipali ta' test u li tiktibhom fil-qosor f'lingwaġġ ċar.

Tul massimu tat-test: 30 minuta.

Punteġġ: minn 0 sa 40 punt - Minimu meħtieġ: 20/40

(d)     Test tar-riformulazzjoni bl-Ingliż: riformulazzjoni ta' test kumpless bl-Ingliż b'lingwaġġ ċar għaċ-ċittadini. L-objettiv ta' dan it-test huwa li jevalwa l-kapaċità tiegħek li tfassal test li jinftiehem u aċċessibbli għaċ-ċittadini.

Tul massimu tat-test: 60 minuta.

Punteġġ: minn 0 sa 40 punt - Minimu meħtieġ: 20/40

Dawn it-testijiet fuq il-kompjuter jistgħu jsiru mill-bogħod.

L-20 kandidat li jkunu kisbu l-ogħla għadd ta' punti fit-testijiet bil-miktub jiġu mistiedna għat-testijiet orali, bil-kondizzjoni li jkunu kisbu l-marka minima meħtieġa għal kull test.

Testijiet orali

(a)     Intervista mal-kumitat ta' selezzjoni bil-lingwi 1 u 2, li permezz tagħha tkun tista' tiġi vvalutata l-kapaċità tal-kandidati li jwettqu l-funzjonijiet deskritti fil-punt "Deskrizzjoni tal-funzjonijiet" fi ħdan istituzzjoni Ewropea, b'kunsiderazzjoni tal-elementi kollha mniżżlin fil-fajl tal-applikazzjoni.

Tul massimu tat-test: 45 minuta.

Punteġġ: minn 0 sa 40 punt - Minimu meħtieġ: 20/40

(b)     Test ta' diskussjoni fi grupp jew logħba ta' simulazzjoni tar-rwoli bl-Ingliż sabiex il-kumitat ta' selezzjoni jkun jista' jivvaluta l-kapaċità ta' adattament u ta' diplomazija kif ukoll l-imġiba tiegħek fi grupp jew meta tkun tinsab f'sitwazzjoni partikolari.

It-tul tat-test ta' diskussjoni fi grupp se jiġi stabbilit mill-kumitat ta' selezzjoni skont il-kompożizzjoni definittiva tal-gruppi.

It-tul massimu tat-test tal-logħba ta' simulazzjoni tar-rwoli huwa 25 minuta.

Punteġġ: minn 0 sa 20 punt - Minimu meħtieġ: 10/20

Dawn it-testijiet jistgħu jiġu organizzati mill-bogħod.

Se tirċievi fi żmien xieraq l-istruzzjonijiet dwar it-testijiet (bil-miktub u orali). It-testijiet huma skedati li jsiru f'data u f'ħin preċiżi. Jekk ma tirrispondix għall-istedina, jekk ma tkunx tista' tiġi kkuntattjat permezz tal-email jew jekk ma tippreżentax ruħek għal test, tiġi skwalifikat. Jekk jogħġbok segwi kelma b'kelma l-istruzzjonijiet mogħtija. Jekk ma ssegwix l-istruzzjonijiet jew jekk l-imġiba tiegħek ma tkunx konformi mal-istruzzjonijiet, tiġi skwalifikat minnufih.

4. Inklużjoni fil-lista ta' riżerva

Abbażi tar-riżultati miksuba, il-kumitat ta' selezzjoni jagħżel l-10 kandidati li hu jqis l-aktar adatti sabiex jeżerċitaw il-funzjonijiet indikati fil-punt "Deskrizzjoni tal-funzjonijiet" ta' dan l-avviż ta' reklutaġġ u jdaħħalhom fil-lista ta' riżerva. Il-lista ta' riżerva se tinkludi, f'ordni alfabetiku, l-ismijiet tal-10 kandidati li jkunu kisbu l-ogħla għadd ta' punti fil-proċedura kollha (l-evalwazzjoni tal-kwalifiki u t-testijiet) u li jkunu laħqu l-livell minimu meħtieġ f'kull wieħed minn dawn it-testijiet.

Il-lista ta' riżerva tiskadi fil-31 ta' Diċembru 2024. Il-lista' ta' riżerva tista' tiġi estiża b'deċiżjoni tal-Awtorità tal-Ħatra. F'dan il-każ, il-kandidati mniżżlin fil-lista ta' riżerva jiġu informati fi żmien debitu.

Il-kandidati jiġu informati individwalment bir-riżultati tagħhom u l-lista ta' riżerva tiġi ppubblikata fuq l-intranet tal-Parlament Ewropew.

Jekk inti tirċievi offerta ta' impjieg, tkun mitlub tippreżenta l-kopji oriġinali tad-dokumenti kollha meħtieġa, b'mod partikolari d-diplomi u ċ-ċertifikati tal-impjieg tiegħek, sabiex tkun tista' ssir verifika.

Il-fatt li ismek jitniżżel fil-lista ta' riżerva ma jikkostitwix dritt jew garanzija ta' reklutaġġ.

C. TRESSIQ TAL-APPLIKAZZJONIJIET

L-applikazzjoni trid issir permezz tal-pjattaforma Apply4EP.

Jekk jogħġbok aqra sew il-gwida għall-kandidati fil-proċeduri ta' selezzjoni organizzati mill-Parlament Ewropew qabel timla l-applikazzjoni tiegħek u pprovdi d-dokumenti ġustifikattivi rilevanti.

Data ta' skadenza għat-tressiq tal-applikazzjonijiet

Id-data li fiha jagħlqu l-applikazzjonijiet hija

d-19 ta’ April 2021 fil-17.30, ħin tal-Brussell.

Tintbagħatlek konferma ta' riċevuta awtomatikament malli tivvalida l-applikazzjoni tiegħek.

Inti mitlub MA ĊĊEMPILX rigward il-kalendarju tal-proċedura.